Latest News

Ramri buaina Home Minister in ala tlawh lo chu MZP in hriatthiam har an tih thu an sawi

MZP General Hqrs. chuan Home Minister in ramri buaina hmun hrang hrang ala tlawh lo chu hriatthiam har an tih thu sawiin, Chief Minister hriatpuina lova Official te hmalakna chu an dem thu an sawi bawk.

Tunhnaia ramri-a buaina thleng kaihhnawiha hmalakna kal zel chungchang ah nimin khan MZP chuan Aizawl-ah thutkhawm hmanhmawh neiin Mizoram sawrkar-a Home Secretary in niminpiah lamah ‘Assam ramah IR te kan dah lo, Mizoram-ah kan dah,’ a tih hnu lawka Mizoram sawrkar in IR te a hnukkir leh si chu, “A hmaa Home Secretary Pi Lalbiaksangi'n IR te awmna a sawi chu Assam ramah Mizoram sawkarin a ngai leh si em ni?” tiin an zawt a. Home Minister, Lalchamliana’n ramri buaina hmun hrang hrangte pawh a la tlawh lo chu hriatthiam har an tih thu sawiin, “Ramri avanga harsatna hrang hrang thlen mek lai a IR te an duty na atanga hnuhkir an ni leh Assam Police te an rawn chhoh avang hian a rang thei ang bera an awmna ngai a awm leh nghal turin sawrkarin hma la nghal se kan duh a ni,” an ti.

MZP chuan ramri buaina kan tawh mekah nuimin-a IR Duty te an awmna atanga Vairengte lama an insawnchho chu diklo an tih thu pawh sawiin, “Ramri humhalhna kallai meka sawrkar chetdan hi mak kan tiin, hriatthiam har kan ti takzet a ni,” an ti a. Assam Police te chu Vairengte dai Auto Stand-ah an rawn thleng tawh nia sawiin, Assam Police te chu chhuktir lehnghal turin sawrkar an phut tih an sawi a. Hemi chungchangah hian Chief Minister pawh be nghalin, Chief Minister hian heng thil thleng te hi a hriat loh avangin Home Minister, Chief Secretary leh Home Department official te hnenah an position ngeia awm leh tur leh Assam Police te pawh chhuk leh vek turin Home Minister leh official te a hrilh nghal chu lawmawm an tih thu an sawi a. Chief Minister hriatpui loh a Official lam ten hetianga hma an la chu an dem takzet tih an sawi bawk.

Ramri humhalh tura IR te an duty-na hmun atanga sawnchhuah an nih avang leh nizan atanga kawng dangtu MZP hruaitute leh Vairengte Thalai  Pawl hruaitute Police in an man avangin MZP chuan a rang thei ang berin Vairengte-ah kawng dang chhunzawm turin kal nise an ti bawk a, hemi ang hian nimin khan MZP hruaitu rual te hian Vairengte hi an pan leh nghal a ni.

Hetihlai hian Vairengte atanga kan thudawn chuan lirthei te hi tluang takin an rawn lut tawh tih a sawi a. Nimin lam khan nitin mamawh chi hrang hrangte pawh Motor lian hmangin engemaw zat chu rawn phurh-luh nghal a ni bawk.

Comments

Popular News (Last 30 Days)