132kV Single Circuit Transmission Line hawn a ni

Zuangtui atanga Mizoram chhimlam Eng pekna tur, 132kV Single Circuit Transmission Line Melriat chu nimin khan P&E Minister, R. Lalzirliana chuan hawngin nimin vek khan Lunglei-ah he Line thar lawmna hi neih a ni bawk.

P&E Minister, R. Lalzirliana hian nimin khan 132kV Sub-Station, Melriat-ah Power Switch hmetin 132kV Single Circuit Transmission Line hi a hawng a, hemi rual hian Lunglei (Khawiva) ah HPC Vice Chairman, Lawmawma Tochhawng MLA hovin Power dawn lawmna hi neih a ni bawk a, Melriat atanga Lunglei (Khawiva) Sub-Station a Power dawn a nih hnu hian HPC Vice Chairman hian Lunglei khawchhung leh chhimlam power semdarhna a nei chhunzawm nghal bawk a ni.

132kV Single Circuit Transmission Line Melriat to Khawiva hawn ani chu Mizoram mipuite, a bik takin chhimlam District mipuite tan hmasawnna mellung pawimawh tak a ni tih HPC Vice Chairman chuan sawiin, he project ti puitling tura theihtawp chhuaha hnathawktu P&E Department chungah lawmthu a sawi a. He project ti hlawhtling tura hun leh tha leh ngaihtuahna nasa tak sengtu tlawmngai pawl, Media te leh mimal thahnemngai te fakawm a tih thu sawiin, an chungah lawmthu a sawi bawk. HPC Vice Chairman chuan 132kV Line Melriat to Khawiva tih hlawhtlin tak chuan sawrkar department hrang hrang leh kan economy ah nghawng tha tak a nei zel dawn tih pawh sawiin, Industry, Entrepreneur leh sumdawnna hrang hrang te pawh chak zawkin hma an la thei dawn tih a sawi bawk.

He hunah hian Power Maintenance Division-II a Executive Engineer, Er. Zodingliana chuan Lunglei, Lawngtlai leh Siaha District te hian Power Supply hi Aizawl Zuangtui S/S atangin Bukpui (Serchhip S/S) Khawiva S/S kal tlangin an hmu tih a sawi a. He line hi a hlui tawhin enkawl a ngai hautak hle a, rei tak tak power supply khaih lak chang a tam hle thin tih sawiin, chumi chhawk nan chuan P&E Department chuan 132kV S/S Melriat-Khawiva line, KM 110-a thui chu Contractor, M/s Tantia NMTPL(JV) Kolkata ten an thawk ta tih a sawi a. Harsatna tam tak- ruahtui tam vanga kawng chhia, ram neitute vanga harsatna te, COVID-19 vanga harsatna leh harsatna dang dang karah kumin June 30 khan hna hi thawh zawh niin Technical Test Charge pawh kumin August 14 khan hlawhtling taka neih anih thu a sawi bawk.

132kV Single Circuit Transmission Line hi cheng nuai 4498.06 senga thawh niin DoNER bakah SMS leh SEDP atangin sum hmuh a ni a, KM 110-a thui he Electric Line-ah hian ban 252 awmin Serchhip lam tlangdung-ah Electrict line chhia a awm pawhin he Line hmang hian chhimlam atangin Power rawn pek let theih a ni tawh dawn a ni.

Comments

Chhiar Hlawhte