Synod Moderator in ‘Sikulpui’ a hawng

Aizawl-a ‘Sikulpui’ chu Mizoram Synod kuta hlan a nih hnuah nimin khan a hawnna neih a ni.

Zosap Missionary Pu Zosaphluia’n kum 1898-a a din, kum 1905-a sikul building sak ‘Sikulsen’ tih leh kum 1914 a sak ‘Sikulpui’ tih building leh a ram te, sikul bungrua zawng zawngte hi Mizoram sawkarin kum 1952-ah Kohhran kut atangin a la a, kum 68 zet sawrkar kuta a awm hnuah a tira dintu leh neitu Mizoram Synod kutah hlan let leh niin Sikulsen (Boys' Primary School) leh Sikulpui (Boys' Middle School) te hi kaihkawpin ‘Sikulpui’ tia vuah niin Mizoram Synod kutah nikum May 29 khan a hlanlet leh a ni a. Nimin khan Sikulpui Hall, Mission Veng-ah a hawnna hun hi hman niin Mizoram Synod Moderator, Rev. R. Lalchangliana chuan School hi a hawng a ni.

Nimin-a ‘Sikulpui’ hawnna hun hi School Education Minister, Lalchhandama Ralte chuan hmanpuiin a taka Sikulpui kalpui tura hawn a lo ni ta chu lawmawm a tih thu a sawi a. Zirtirtute chu Textbook knowledge ringawt ni lo, naupangte theihna phawrhchhuah sak tura an theihna hmang tur leh sawrkar hnathawk tur lehkhathiam ringawt ni lo, Private Sector lam thlenga chhawrtlak mi thiam chherchhuak turin a fuih a. Sawrkar, Kohhran leh khawtlang te tangrualin Sikulpui chu ram siamthatna hmun pawimawh tak a nih theih nan duhsakna a hlan a ni.

Sikulpui hawn takah hian Teaching Staff 13 leh Non-Teaching Staff 3, an vaiin thawktu 16 an awm a. Nimin-a a hawnna hun hman hi School Education Department hotute leh Synod hotute bakah INTACH Mizoram Chapter hruaitute pawhin an hmanpui a ni.