Tui tla thlahna hun hmang

Tun thla ni 8-a Tuikum lui, Vanchengte kai-a chesuala tui-a tla, K. Lalngaihdami chu a ruang pawh hmuh a nih tak loh avangin nimin khan an chenna In ah Kohhran in thlahna hun an hmang.

Kar kalta Ningani chawhnu lama Tuikum lui-a chesuala tui-a tla ta, K. Lalngaihdami (14), K. Chanchin-mawia fanu hi Mizo Dan-ah khawtlang huapa ni 7 chhung zawn a nih hnuah a ruang pawh hmuh a nih tak loh avangin nimin khan an Kohhran chuan an chenna In ah thlahna hun an hmang a, he hunah hian Bialtu Pastor, Rev. Zohmunmawia chuan hunserh hmangin thlamuanna thuchah a sawi a, Lalngaihdami ruang zawn hna hi thawh tawhloh tur tihna a nih loh thu leh Mizo dan-a khawtlang huapa a zawnna hun khar a nih hnuah Kohhran lam chuan hetianga hun an hman thin anga he hun hi hman a nih thu a sawi bawk.

Nimin a Lalngaihdami thlahna hunah hian a pa, K. Chanchinmawia chuan a fanu chanchin hi sawiin, an harsatna tawh chhunga tanpuitu khaw-tlang mipuite leh a zawn hna thawktu Serchhip mai bakah khaw hrang hrang ami te hnenah lawmthu a sawi a. An lawina Kohhran, Peniel Kohhran ten ralna thilpek an hlan bakah Chhekhnai Branch YMA te pawhin tui tla zawn hna an thawh dan tlangpui an sawi bawk.