Chanchin thar thenkhat :

Central YMA in mipuite chah

Central YMA chuan hripui (COVID-19) in Mizoram min chenchilh mek karah mipuite himna tura Sawrkar Department hrang hrang, thawktu hrang hrangte leh Local/Village Level Task Force-te hmalakna ah lawmthu an sawi a. Hripui lengin min kiansan deuh nia a lan laiin, October, 2020 thla laihawl atangin hrilengin Mizoram hmun hrang hrang min nuai leh tan ta nia tarlangin, Mizo mipuite kan him tlan zel theih nan sawrkar thupek leh Veng/khaw tina Task Force-te thu leh hla ngaichang a, zawm theuh turin mipui te an ngen a, Hrileng avanga harsatna tawk te chhawmdawla tanpui zel thei turin mitinte i in-buatsaih turin an chah bawk.

A&C Minister in hawng

Art & Culture Department changtu Minister, R. Lalzirliana chuan niminpiah tlai khan Reiek khaw panna kawng ah Hangzo Natural Park, Zawh-zazo Run a hawng a, he hunah hian Art & Culture Minister chuan Zoram chu thlai engkim thatna hmun a ni tih sawiin, “Rim taka kan thawh chauhin kan ram hi hlim takin kan luah thei ang,” a ti a. Thalaite chu mahni hna theuh rim tak leh taima taka thawk turin a chah bawk.

HPC Party inthlang dawn

Hmar People’s Convention (HPC) Party, Thang-liensung Hmar kaihhruai leh Lalrosiem kaihhruai te chuan HPC party dik tak/ziding zawk nih inchuha Court-a hun rei tak thubuai an neih hnuah Court chuan HPC party hruaitu tur Party mipui pawm theih ngei nei tura inthlanna thianghlim leh felfai buatsaih turin thupek a siam a, hemi ang hian Nov. 5, 2020 khian inthlanna neih tur niin inthlanna  atan hian khaw 6-ah Vote thlakna siam a ni ang.

BJP thlawp theilo tih sawi

Lai Autonomous District Council (LA-DC)-a Congress Legislature Party Member 6 te chuan nimin khan CEM hnenah lehkha thehlutin BJP Legislature Party an thlawp theihloh thu an thlen a, an zinga LADC Sawrkar a nihna pawimawh nei, Executive Member 3 , Town Committee Chairman leh Deputy Chief Whip te chuan an nihna atanga banna CEM hnen ah hian an thehlut nghal a ni.

Bomb hmangin School bei

Nizan hmasa khan Saihapui V-a Dolakhal ME School chu Bomb hmanga tihchhiat a ni a, Vairengte Police Station-ah thubuai ziahluh nghal a ni. Thudawn danin Bomb hmanga School beih hun hi zan dar 10:30 vel niin he School building bang leh chung a chhe nual a, he School-ah hian Mizo naupangte chu an kal ngailo nia thudawn niin Leilet enkawltu hnamdang naupang tlem an kal thin nia sawi a ni.

He thil thleng chungchangah hian nimin chawhnu lam khan Assam lam atangin enquiry lak tumin Addl. SP hovin Police thenkhat an kal a, amaherawh chu Saihapui V-a Police duty te chuan Enquiry an lak tawh thu leh Case pawh file a nih tawh thu lo hrilhin, Assam Police te hi an kir leh a ni. 

MPYCC in sawrkar an phut

Mizoram Pradesh Youth Congress Committee (MPYCC) chuan Mizoram leh Assam ramri buaina kal mêkah Oct. 21, 2020-a Lai-lapur-a Mizoram aiawh Home Secretary leh Assam Home Secretary te inbiakna Chief Minister, Zoramthanga'n a hriatpui loh thu a sawi ta mai chu a pawi takzet tih an sawi a. Chief Minister hian ramri chungchanga State pahnih inbiakna a hriatpui lo tak tak a nih chuan rorelna mumal lo, 'administrative lapse' lian tak a nih tur thu leh a hre reng a nih phei chuan khawvel mit hmuhah dawt a sawi tihna a ni tih apawh sawiin, Mizo-ram sawrkar chu Mizoram ramri-a a pawm chin ah Police Outpost nghet (Permanent Structure) siam tura an phut thu an sawi bawk.