Inrinni khan Mizoram-ah Sample 3866 enfiah niin hri kai 345 hmuh a ni a, Inrinni-a hri kai hmuhchhuah thar tarlan zingah hian a hma lama Lawngtlai District chhung Karlui-I a hri kai lo hmuhchhuah tawh mi 147 zet chu ziahluh thar an nih avangin hri kai hmuhchhuah hi a tam phah niin a lang.
Synod Hospital, Durtlang-a naupang damlo enkawl pakhat chu natna chi khat, a bik takin naupang COVID-19 lo vei tawh a awm ve thin Multisystemic Inflammatory Syndrome in Children (MIS-C) case ni thei a ngaih a ni.
COVID-19 dona leh damlote enkawlna tur damdawi leh hman-rua atana GST lak chungchang sawihoin Inrinni khan Union Finance & Corporate Affairs Minister, Nirmala Sitharaman-i kaihhruai GST Council Meeting Vawi 44-na neih a ni.
Thinghlun ramchhung a John Zolawma Thlam hal chhiatna hmun bul, ramri dep a BSF te inkulhna chu thuamthat mek niin, Mizoram 4th IR te in kulhna erawh thuamthat a la ni lova, thuamthatna tur sum erawh ruahman fel a ni tawh.
Mamit District Bawrhsap, Dr. Lalrozama chuan tunhnaia Chuhvel ramchhunga thil thleng chungchangah Inrinni khan Chuhvel ram a tlawh.
Zirtawpni zan khan Aizawl Thuampui Veng-ah lungrem chim in In pakhat hnawlin mi 4 in nunna an chan a, he chhiatna thlen dan chhui chiang tur hian Inquiry Committee din a nih tur thu DM&R Minister, Lalchamliana chuan a sawi.
Tunhnaia hri kai hmuhchhuahna, Central Jail, Aizawl-ah hri kai mi 96 hmuhchhuah an ni tawh a, mi engemaw zat khunghran an la ni bawk.
Serchhip District-a khaw 6-ah African Swine Fever (ASF) avanga Vawk thi chu 250 a tling tawh.
Mizoram-a kum 18 leh 44 inkarte hnena COVID-19 vaccine pek hna kalpui mek chu Vawiin, June 14 atanga June 18, 2021 thleng khian Serchhip CMO Office Building-a Main Centre-ah kalpui chhunzawm leh a ni dawn a, Vaccine pek dan kalpui mek angin Vaccine la duh tan Self Registration tih a, Vaccine lakna tura inziahluh hmasak leh tur a ni dawn a. In register hun hi vaccine lak dawn ni hma zan zelah zan dar 9:00-ah hawn leh thin a ni ang.
Serchhip District-ah COVID-19 hri kai mi 655 hmuhchhuah ni tawhin hri kai hmuhchhuah atanga za zela 95.57 enkawl dam an ni tawh.
Serchhip District Bawrhsap chuan Guwahati High Court Aizawl Bench in Judgement & Order a siam angin mi tumahin sawrkar in thuneihna a pek ang piah lamah dan leh thupek an siamchawp tur a ni lo tih a sawi.
Mizoram-a COVID-19 hri leng avanga Total Lockdown kalpui mek chu kalpui chhunzawm tura tih a nih angin Serchhip District-ah pawh tun thla ni 21 zing dar 4:00 thleng atan kalpui leh a ni dawn a, hemi atana inkaihhruaina tur pawh nimin khan tihchhuah nghal a ni.