Lenkawl

Mizoram Legislative Assembly Budget Session chu ni 17 chhung neih a nih hnuah nizan hmasa khan zawhfel a ni ta.

Mizoram Larsap General (Dr) Vijay Kumar Singh chuan Mizoram chu khawtlang inkaihhruaina nei tha tak, India rama State ralmuang berte zinga mi, hnam bil inkara inepna liantham awm lohna, politic ngelnghet tak awmna a nih thu sawiin, hmasawnna pawh chak taka kalpui mek a nih thu a sawi.

Nimin khan Lawngtlai-ah Bawrhsap Donny Lalruatsanga hovin Thaltlang khua leh Phawngpui National Park ramri chungchangah thukhawm neih a ni.

Mizoram Mistiri Association (MMA) chuan nimin khan Aizawl-a Synod Conference Centre-ah General Assembly vawi 11-na hmangin LESDE Minister Lalnghinglova Hmar chuan khuallian niin a hmanpui a. Mizoram Mistiri Association chu Mizo hnam dam khawchhuah nan a hlu tih sawiin, “Hnamdang mistiri ten hnathawkin min rawn luhchilh a, chutah chuan keini in kan kut thiamna hmangin tan kan lo khawh a pawimawh a, kan hnam tan thahnem kan ngaih a pawimawh hle,” a ti a. Mizoram Building & Other Construction Workers Welfare Board (MBOCWWB) hnuaia hamthatna chu kuthnathawktu zawng zawngin dawng se an duh thu a sawi bawk.

Aizawl khawpui laili-a Assam Rifles te chhuahsan ram-a Heritage Court tlang-ah Aizawl khawpui chei tharna hnathawh bul tanna lungphun chu nimin khan Chief Minister Lalduhoma chuan lungphum a hawng a. UD&PA Minister K. Sapdanga leh Speaker Lalbiakzama bakah Minister leh MLA engemaw zat an tel a ni.

Aizawl Smart City Limited hmalaknaa din, Durtlang Football Stadium chu nimin khan UD&PA Minister K. Sapdanga chuan a hawng. Cheng vbc. 22.3 senga din he Stadium hawnna hunah hian UD&PA Minister chuan sawrkar hmasa hmalakna fakin, Mizoram-a Football khelmual tha ber hawn a ni thei ta chu lawmawm a tih thu a sawi bakah a panna kawng tur pawh ngaihtuah mek a nih thu a sawi a. Sports Minister Lalnghinglova Hmar pawhin he hunah hian thu a sawi bawk a ni.