Industry neitu ten Kawlphetha chhitman tihsan duh lo

Tunhnaia Mizoram sawrkarin kawlphetha chhit man tihsan rawtna JERC (for Manipur & Mizoram) hnena a thlen chungchangah Mizoram Industry Owners Association (MIOA) chuan kawlphetha chhit man tihsan hi tha an tih loh thu resolution an siam.

Nimin-a MIOA hruaitute an President F. Rodingliana In-a thukhawm chuan, nikum 2021 maia kawlphetha chhitman tihsan anih khan ni danga an la chawi ngai loh Transmission Loss, Transformer pakhatah cheng sang tel an chawi belh tawh tih an sawi a. “Tuna Power Tarrift thar turah hian Distribution Loss 17.90% chawi belh tur alo awm thar leh nen, kawlphetha chhitman a lo san chuan kan thil siamchhuah (production) man a to dawn avangin Industry neitute bakah mipuiin an tuar dawn a ni,” tiin, kawlphetha chhitman tihpum leh tumna hi tha an tih loh thu resolution an siam a ni.

Mizoram-a Industry neitute chuan Power Supply mumal lo an tawrh thin thu sawiin, “Darkar khat lek chhunga vawi hnih vawi thum shutdown a awm te hian cheng sing tel an hloh zel a, State danga Industrial Estate-ah te chuan Power Supply an shutdown dawnin hriattirna an pek hmasak thin laiin, Mizoram-ah chuan engmah inhriattir lawkna a awm ngai lo,” an ti a. Kawlphetha chhitman tihsan luih a nih pawhin a Maintenance lamah tal tan la turin JERC an ngen nghal bawk.