Chanchin thar lawrkhawm :

MJA in hmalakna an tlawh

    Mizoram Journalists' Association (MJA) Mamit District chuan nimin khan District Cooperative Societies, Mamit District bultuma Pradhan Mantri Van Dhan Yojana (PMVDY) hnuaia hmalakna hrang hrangte a hmunah kalin an tlawh a, Darlak Piggery Cooperative Society Ltd. chuan Vaimim leh Bekang chin nan tin 50 a zau ram an vah thu lo hrilhin, Darlak Van Dhan Vikas Kendra (VDVK) hnuaia Darlak Integrated Fish Farming Co-operative Society Ltd. te'n Kuhva nuai 5 Scoop theihna tur Tanky an siam chu an tlawh nghal bawk. Hei bakah hian Tuidam Consumer Cooperative Society Ltd. in Kuhva nuai 1 man an Scoop mek-na pawh tlawhin, Zawlnuam Consumer Cooperative Society Ltd. in Kuhva Scoop-na tura hma an lakna te an tlawh bawk.

SRDC Rest House hawng

   Hrianghmun khua a Sialkal Range Development Council (SRDC) Rest House sak thar chu nimin khan SRDC-a Development Officer Ngulzathuama MCS chuan a hawng a, SRDC vanga hmasawnna tam tak an hmuh mek thu he hunah hian sawiin, Chief Minister Zoramthanga duhsakna SRDC in an dawn nasat thu a sawi a, “Kan Budget pawh nasa takin min tihpunsak a; Aizawl-a Cell Office min pek te, SRDC area chhunga cheng Zirlaite awmna tur Hostel, Luang-mual, Aizawl-a sak mek te, SRDC area a hma-sawnna hna tam tak kan thawhte hi lawm nachang kan hriat a tul a ni,” a ti bawk.

Eirawngbawlna Gas harsa lo

    Supply Minister K. Lalrinliana chuan eirawng-bawlna Gas supply chungchangah Mizoram chuan harsatna a tawk lo tih nimin a Assembly inkhawm ah sawiin, Mizoram-ah ni tin Gas cylinder 7000 vel, lirthei phur 24 thleng ziah anga ngaih a ni tih a sawi a. Sawrkar laipuiin ruahmanna a neih zingah State khawpui tina Gas pipeline siam a tel thu leh hei hi kum 2019 atanga tum tawh niin, hri lêng vangin a la hlawhtling thei lo tih a sawi bawk.

Nature Park siam thar hawng

    NEC sum cheng nuai 359.21 hmanga rua-hman Samthang khaw lu-a Zopui Phul Samthang Nature Park siam thar chu nimin khan Champhai DC Maria CT. Zuali chuan a hawng a, Project kentel zingah Aproach road, Dilpui tuikhuah leh lenvelna Lawng, chhungkaw 6 tan Homestay, Eco Toilet, Log Cabin, Eco-Cafeteria, Camping & Hiking equipment,Orchid House and Propagation Centre leh Bazar Shed-te a tel a ni.

Mipui en theihin phochhuak

    Mizoram Science Centre chuan Polar Satellite Launch Vehicle (PSLV C31) leh Radio Controlled Model Airplane te chu nimin khan mipuite tana hmuh leh belhchian theih turin an phochhuak a, PSLV C31 Model hi Mizoram Science Centre-a Technical Staff te kutchhuak niin RC Model Airplane hi Innovation Hub, MSC-a Mentor leh Mizoram Aeromodellers Association te duanchhuah a ni.

Comments

Popular posts from this blog

Tukverh-a tlasual boral