COVID-19 hri leng avanga inkaihhruaina thar Mizoram-a hman tur tihchhuah a ni

Mizoram sawrkar chuan COVID-19 hri leng mek-a mipui inkaihhruaina tur a siam thar leh ta a, he inkaihhruaina hi thu leh awm hma atana hman nghal tur niin Board Exam turte tan ni lo chuan zirna In te chu khar zui tur ala ni dawn a ni.

Nimin-a State Executive Committee-a Chairman leh Mizoram Chief Secretary Renu Sharma-i’n thuchhuah siama a tarlan danin Mizoram-a COVID-19 hri leng mek dinhmun thlirlet a nih thu leh tunhnaiah nasa takin hri a darh bakah positivity rate pawh a sâng hle tih hriat a ni tih a tarlang a. Mizoram chhungah COVID-19 hri pangngai baka ‘Omicron’ an tih darh zel tur ven nan inkhuahkhirhna nasa zawk siam turin thuneitute rawn chungin thutlukna siam a ni tih a tarlang a. Hemi ang hian AMC huamchhungah chuan loh theih loh thilah lo chuan pawn chhuah leh inlenpawh loh tur a ni tih tarlangin, Building khata In hrang hrang luahte pawh intlawhpawh loh tur a ni tih a tarlang a ni.

AMC Area pawn lamah chuan Deputy Commisioner ten Health & Family Welfare Department-in COVID-19 Third Wave laka hmalak dan tur inkaihhruaina a chhuah chu khauh taka kenkawh a nih theih nan hma an la anga, Class X leh XII Board Exam turte chu School Education Department thuchhuak angin CAB tha taka zawm chungin School leh Hostel hawn phal a ni a, Class I atanga Class IX leh Class XI zirlaite tan School leh Hostel kharin, Online-in Class lak chhunzawm tur a ni ang.

Red Zone puanna huamchhungah te chuan Sakhaw biak In te khar tur niin Sakhaw biakna hawi zawnga punkhawm phal a ni lova, Red Zone pawnlam ah erawh chuan Biak In-a leng zat chanve aia tam lovin Kohhran Inkhawm pangngai neih phal a ni a, Kohhran Inkhawmpui chu chhun lamah chauh neih phal niin Hripui darh theihna tur ven nan, a theih chin chinah hla/rimawi thun (record) sa te play tur a ni a, zaikhawm, zaiho leh zaipawl hla sakho te khap a ni.

Bazar leh dawr hawn phal a ni a, Red Zone huamchhunga dawr erawh inhawn chhawk tur a ni dawn a, Executive/Police duty te chu bazar lun deuh laiah CAB kenkawh a nih theih nan duty tura ruat thin an ni bawk ang.