Valentines Day pualin thisen Unit 931 pek a ni

Nimin khan Mizoram hmun hrang hrangah Valentines Day pualin thisen Unit 931 pek a ni.

Valentines Day pual hian Association for Voluntary Blood Donation (AVBD), Mizoram State AIDS Control Society (MSACS) leh Blood Bank hrang hrangte chuan midangte tana thisen pekna hun hi an buatsaih a, he ni puala inkhawm lian ber Civil Hospital Aizawl-a Model Blood Bank-a neih ah Civil Hospital Medical Superintendent Dr. Lalhmuchhuaka chuan thisen pekna hun hi a hawng a, thisen chu a tlukpui mithiamte’n an la siam chhuah theih loh, mihring in a pek theihte zinga hlu bik a nih thu sawiin, thisen petute a chhuan thu a sawi a, “Thisen pek hi thil hlu danglam tak, kan hmelmate leh kan mil vak loh zawngte pawh ni se, an chunga hmangaihna kan lantir theihna remchang tak a ni,” a tiin thisen petute chu pe chhunzawm zel turin a sawm bawk.

Valentine's Day puala thisen pek rûnpui hi kum 2010 khan Civil Hospital, Aizawl-ah buatsaih tan a ni a, kum 2013 atangin AVBD bultumin Blood Bank leh MSACS te nen huaihawt a ni a. Nimin khan Civil Hospital Aizawl-ah thisen Unit 332 pek niin Synod Hospital-ah Unit 148 leh ZMC-ah Unit 115 pek a ni a. Lunglei Civil Hospital-ah 71 leh Christian Hospital, Ser-kawn-ah Unit 23 pek ni bawkin Serchhip-ah 67, Lawngtlai-ah 62, Kolasib-ah 44, Mamit-ah 31, Siaha-ah 22 leh Champhai-ah Unit 16 pek a ni bawk a ni.