Champhai leh Hnahlan Grape Growers' Society hruaituten an harsatna sawrkar ah an thlen

Champhai leh Hnahlan Grape Growers' Society hruaitute chuan Mizoram sawrkarah tuna Wine an kawl lai mek tihralna ngaihtuahsak turin an thlen a, an lo chhan danah beiseina neih dan tur erawh hriatthiam har an tih thu an sawi.

MLP Rules Drafting Study Committee in MLP Rules-ah Wine siam phalna telh loh nise tia an rel thu kal zelah nimin khan Champhai leh Hnahlan-a grape chingtu pawl hruaitute chuan Chief Minister Zoramthanga chu a Pisa-ah an kawm a; hemi hma hian MLP Rules Drafting Study Committee Chairman leh Deputy Chief Minister ni bawk Tawnluia chu a Pisa-ah kawm bawkin, tuna an Wine kawl lai te Mizoram hmun hrang hrangah tihralna buatsaihsak tur leh, MLP Rules-a Wine siam phalna telha Wine-ah alcohol 11% anga kalpui turin an ngen a ni.

Chief Minister an kawm zawha thuthar thehdarhtu thenkhat te zawhna chhangin, “Chief Minister Pu Zoramthanga leh Deputy Chief Minister Pu Tawnluia te hnena kan thlen leh dilna te hi anni chuan an lo ngaihtuah anga, an lo sawi ho ve tur thuin min chhang a. Kan thil duh leh thlen te hi tuna a hlawhtlinna hmuh theih nghal tur ang chi erawh chu a awm hran lo,” tiin Champhai Grape Growers' Society Chairman HS. Vanlalfakzuala chuan a sawi a. “Cabinet thutkhawmah an la ngaihtuah ngei tur thil a nih avangin, chumi hunah chuan kan duh leh ngenna te hi a hlawhtlinna leh hlawhchhamna te a la hriat theih dawn chauh a. Tun dinhmunah, Chief Minister leh Deputy Chief Minister te nena inkawmna kan neihah hian beiseina neih dan tur pawh hriatthiam a la har rih,” a ti a. Chief Minister hnena tuna Wine an kawl lai mek te, nikum hmasa leh nikum thar Wine thahnem tak an neih te Mizoram hmun hrang hranga zalen taka an hralh ral theihna tur ngaihtuahpui tura an ngenna te hi chawp leh chilha sawrkar tan pawha tihhlawhtlin har dawnin lang mah se, tun atanga tihral nghal mai an duh tawh thu a sawi a, “MLP Rules peih hma a, zalen taka kan hralh a, kan tihral theihna tur kha kan ngen a ni deuh ber," a ti.

MLP Rules-ah Wine siam phalna telh loh a nih chuan Hnahlan leh Champhai-a Grape chingtu chhungkaw tam tak eizawnna a chat dawn nia sawiin, “Kan awm zel dan tur leh kan tawrh dan lo lang tur chu hunin a la hril ang. Amaherawh chu, sawrkar chu kan pa ber a ni a, pa ber chuan fa te mamawh ang kha chu min phuhruksak turah chuan kan ngai a ni,” Champhai Grape Growers' Society Chairman hian a sawi bawk.