FMGE&W ten Bagde dum bel tum an thulh rih

Federation of Mizoram Government Employees & Workers (FMGE&W) ten sawrkar laka lungawiloh lantirna atana karleh chhunga Badge dum bel an tum chu thulh leh a ni tih an sawi.

FMGE&W te hian sawrkar-a an thilphut hrang hrang avanga lungawilohna lantir an tum thu an puan hnuah nimin khan Chief Minister Zoramthanga hovin inkawmna neiin Badge dum bel an tum chu thulh turin ngen an ni a, hemi hnu hian FMGE&W chuan Executive Meeting nei zuiin an ngenna te sawrkar in a ngaih pawimawh sak avang leh tihhlawhtlin chhoh zel a tum avangin Feb. 21, 2022 atanga Feb. 25, 2022 chhunga Badge Dum bel tura an lo rel tawh chu thulh rih tur a ni tih sawiin, March 1, 2022-a General Council Meeting tur pawh thulh rih tur a ni tih an sawi a ni.

FMGE&W thuchhuah in a tarlan danin March 1, 2022 atangin Sawrkar hnathawkte DA leh Pensioner te DR chu 17% atangin 28% ah tihsan a ni anga, Financial year tharah a rang thei angin 31% ah tihsan leh tum a ni anga, DA lo pung leh zel tur pawh ngaihpawimawh zel a ni ang. Sawrkar hnathawkte hlawh chu a hun takah pek tum zel a ni anga, Pensioner te Retirement Benefits chu Sawrkarin a theih angin a chingfel zel anga, Pensioner te hamthatna hmuh turte pawh ngaihpawimawh zel a ni ang.