Hri leng hmachhawnna ah MJA chungah lawmthu sawi

Health Minister Dr. R. Lalthangliana chuan MJA te chu Mizoram-in COVID-19 a hmachhawn kawnga tanpuitu pawimawh tak te an nih thu a sawi.

Civil Hospital, Aizawl in MJA Member te puala Free Health Check-up an buatsaih a hmawr bawkna hun nimin-a CHA Doctor Seminar Room-a neih a hmanpuina ah Health Minister Dr. R. Lalthangliana chuan MJA te chu Mizoram-in COVID-19 a hmachhawn kawnga tanpuitu pawimawh takte an ni, tiin lawmthu a sawi a. An hriselna te ngai pawimawha uluk taka inenkawl zel turin a chah bawk.

Health Minister chuan COVID hripui leng kara Civil Hospital Aizawl a hmasawnna hrang hrang sawilangin, Nephrology Department hawn thar a nih thu te, Cardiology Department tihchangtlun nan sum beisei mek a nih thu te, MRI khawl dah thar thuai beisei a nih bakah tunah ICU-ah khum 15 a awm tawh thu te a sawi a. Zemabawk-ah Cancer Superspeciality Hospital din nan JICA sum cheng vbc. 500 senna tur pawh sawrkar laipuiin an pawm sak tawh thu sawiin, he hna hi bultan thuai a nih theih nan sawrkar laipui hnuaia Ministry hrang hrangah Technical Committee khirhkhan tak tak paltlang fel a ni tawh tih a sawi a. Cancer Hospital-ah hian Inhemna, Cobalt Therapy khawl thar bun thuai a beisei thu a sawi bawk.

Doctor, Nurse leh Health Worker indai lohna te sawiin Health Minister chuan, thingtlang-a thawk tur Doctor contract a lak mai tur an awm lo chu pawi a tih thu a sawi a, tuna thawk mekte chu theihtawp chhuah zel turin a chah a. Tunhnai maiah COVID-19 Omicron Variant Mizoram atanga sample thawnah 62 lai hmuhchhuah a nih thu pawh sawiin, MGDA leh IMA ten Treatment Protocol thar an buatsaih a ngaih tur thu a sawi bawk.

Health Minister chuan Civil Hospital, Lunglei-ah MJA member te tan Vawiin-ah Free Health Check-up buatsaih a nih thu sawiin, District hrang hranga MJA member te tan an awmna District a Sawrkar Hospital-ah Free Health Check-up an neih theihna turin ruahmanna siam nise a ti a. MJA ten an Golden Jubilee an lawmna atan cheng nuai khat pek a nih dawn thu a sawi bawk.

MJA Member te tana Free Health Check-up hi tun thla ni 8 atang khan neih niin mi 50 vel te chuan Test leh Investigation hrang hrang an lo nei tawh a. Hetianga MJA tana Free Health check up hi kum 2010 atang khan Civil Hospital hian a lo buatsaih thin tawh a. Nimin a he hun hman ah hian MJA General Hqrs. President Zonunsanga Khiangte pawhin hetianga Free Health Check-up buatsaih sak thintu Hospital hotute chungah lawmthu a sawi bawk a ni.