Gauhati High Court, Aizawl Bench-a Judge pahnih thutna Bench chuan Mizoram Truck Drivers Association (MTDA) thu thehluh chungchangah tun thla ni 4 khan thutlukna siamin Sairang leh Bilkhawthlir inkar kawngpui siamtu Contractor chu kumin April thla tawp hma ngeia kawng siamthat hna zo turin a hriattir.
Tourism Minister Lalnghinglova Hmar leh NITI Aayog Member Dr. VtK. Paul te chu nimin khan inkawmin kumin hian Mizoram Tourism Conclave buatsaih nise an ti a. Hemi chungchang ngaihtuah hian kumin kum chanve hma lamin kokim zawkin thutkhawm neih leh nise an ti bawk.
ZPM Party chuan Lengpui leh Siphir ram Indian Air Force (IAF) hnena hralh/hlan chungchang ah Central Bureau Investigation (CBI) hnena FIR thehlut an awm avangin an thehlut ve ta lo tih sawiin, CBI-in Mizoram sawrkar hnenah Genral Consent an dil chuan pek ngei a nih tur thu an sawi.
Election Commission of India (ECI) chuan February 24 khian ram pum huap State Election Commissioners (SECs)-te inkhawmpui chu a buatsaih dawn a, State leh Union Territories tina State Election Commissioner te chu New Delhi Bharat Mandapam-a huahawt tur he inkhawmpui-ah hian tel vek tura beisei an ni.
HIV/AIDS chungchang inzirtirna, ‘North-East Multimedia Campaign (Red Fest)’ chu nimin khan Aizawl Falkland-a LPS Arena-ah hmangin Health Minister Lalrinpuii chuan khuallian niin a hmanpui.
Nimin khan Prime Minister Programme, Pariksha Pe Charcha 2026 chu Aizawl-a Govt. Mizo High School Multipurpose Hall, MacDonald Hill-ah School Education Minister Dr. Vanlalthlana hovin live-a lo thlirho niin Minister chuan Exam tur avanga zirlaite harsatna sutkian nan helpline siam tum a nih thu a sawi.