BJP in Larsap hnenah ngenna an thehlut

Dan leh thupek kenkawh chungchangah MNF sawrkar chu a hlawhchham nia sawiin, State sawrkar thuneihna laksak turin BJP Mizoram Pradesh President Vanlalhmuaka chuan nimin khan Mizoram Governor Dr. Hari Babu Kambhampati a ngen.

Larsap hnenah ngenna a thehluh ah BJP Mizoram State President Vanlalhmuaka hian, Mizoram sawrkar inrelbawlna fel loh avanga mipui leh ram hmasawnna in a tawrhna te, mipui chhia leh tha hriatna tihchhiata awm mek te, eirukna leh dan loa sumdawng (smuggler) te, dan pawisa lotute Mizoram State chhunga an huangtau lutuk avanga dan kengkawhtute leh hmasawnna hnathawktute kut phuara awm mek te, state sawrkarin sawrkar laipui thupek a pawisak lohte te a tarlang a. “Hetiang renga kan State sawrkar hi a kal chuan, Mizoram leh a chhunga chengte dinhmun chuan chhiat lam a pan tial tialin, ram leh hnam ang pawhin kan thenawm State leh ringlo mite hmuhsit chu kan hmabak mai tur a nih avangin, Mizoram-ah rorelna dik tundin a, dan leh thupek in awmzia a lo neih theihna'n,” tiin, Larsap hnenah MNF sawrkar State thuneihna chu laksak turin a ngen a ni.

Larsap hnena Memorandum a thehluh zawhah BJP State Office-ah thuthar thehdarh tute kawmin Vanlalhmuaka chuan, Mizoram State sawrkar, Chief Minister Zoramthanga kaihhruaiin an intiam ang leh ram dan (constitution) angin hna an thawk em tih enzui tura mipui hmaa an lo sawi thin angin a takin Larsap hnenah Memorandum an thehlut tih a sawi a “RTI hmangin tunah chuan thil tam tak kan hotute hian an lamkhawm tawh a. India ram dan leh mipui hmaa an intiamna pawisa lotute, mipui rawngbawl aia mahni sahmim puarna tur ngaihtuahna avanga dan palzut tute hi kan bei tan dawn chauh a ni,” a ti.

Zawhna chhangin Vanlalhmuaka hian, Larsap chuan an ngenna te chu uluk taka a lo zir tur thu sawiin, “Engkim hi danin ka lo en vek ang a. 'Dan hi a lal ber tur a ni' tiin min hrilh a, keini pawh kan thla a muang,” a ti a. ‘MNF sawrkar paihthlaa State-a President's Rule puan tir tum hi Mizo-ram State BJP hamthatna duh vang a ni em?’ tih zawhna chu, “Keimahni hamthatna atana ti kan ni lo a. Tunah hian living opposition rule kan play mek a ni. Kan tana hlawkna tura hma kan lak leh lak loh chu mipuiin an la hria ang chu,” tiin a chhang a. President's Rule ngawr ngawr an ngen loh thu leh State sawrkar inrelbawlna fellohna kawngah a te emaw, a lian emaw, dan anga hma la tur leh mipui chhan duhna vanga hma an lak thu an sawi a. “President's Rule hi kum khuaa puan tur a ni lo a. Sawrkar kalphung a fel lo leh State sawrkar nih vanga dan pawisa loa mahni duh thu thua chet lak theihna ven nan India danpui behchhana hma la kan ni zawk,” tiin he hunah hian a sawi bawk a ni.