LESDE leh RD Department ten an hmalakna leh hnathawh Mizoram Governor an hrilh

Labour, Employment, Skill Development & Entrepreneurship leh Rural Development Department-a hotute chuan nimin khan Mizoram Governor chu Raj Bhavan-ah hmuin an Department kalhmang te, hnathawh dan te, mawhphurhna an neihte leh Central Schemes an kalpui dan chungchang te an hrilhfiah.

Heng Department hotu ten a hran-a an hmuhna ah hian Larsap chuan Labour, Employment, Skill Development & Entrepreneurship Department chu thalai tana a pawimawh dante sawiin, sawrkar hna in thalai te a daih tawh lova, chuvangin thalai ten private lamah te, Company lamah hna an zawn leh an mahni kutkawiha eizawnna an neih a tul zel dawn a, heng ah hian an tan Skill Development chu kawng pawimawh tak a ni, a ti a. Training Partner ten thalai te tan Skill Development Training hrang hrang an kalpui mek chu a rintlak em, an thiamna pek te chu hna zawn nan leh eizawn nan a hmantlak em tih te chu chik thinin, heng hmun te chu endika tlawh fo thin turin Department hotute a chah a ni.

Hei bakah hian Rural Development Department in Deen Dayal Upadhyaya Grameen Kaushalya Yojana (DDU-GKY) a kalpui mek chu thingtlanga thalai ten eizawnna kawng an neih theih nan kawng hawnsaktu pawimawh tak a nih angin Department hotute chu he scheme hi uluk taka vil turin Governor chuan a chah bawk a ni.

Nimin-a Governor an hmuhna ah hian Rural Development (RD) Department Secretary Vanlalngaihsaka leh LESDE Secretary Lalramsanga Sailo te chuan an Department Officer te hovin an Department kalhmang te, hnathawh dan te, mawhphurhna an neihte leh Central Scheme an kalpui dan chungchang hrilhin presention hmangin an Department chanchin an tarlang a ni.

Presentation an pekah hian Larsap Dr. Hari Babu Kambhampati chuan Labour, Employment, Skill Development & Entrepreneurship Department in Central Scheme an kalpui mek Pradhan Pradhan Mantri Kaushal Vikas Yojana (PMKVY) leh Rural Development in Central Scheme in kalpui mek DDU-GKY te chu thlur bikin, heng Scheme te kalpui dan te chu Department hotulute chhipchhiar takin a zawt a, rawtna thenkhat a neih te a sawi lang nghal bawk a ni.