Lenkawl

Serchhip District Consumers Association leh P&E Department hotute chuan nimin khan Electric Bill chungchangah inkawmna an nei.

Serchhip District-ah COVID-19 hri kai enkawllai mi 56 an awm mek.

Mizoram-ah ni khat-a COVID-19 hri kai hmuhchhuah zat chu ala tlahniam hlei thei lova, niminpiah khan Mizoram-ah Sample 9170 enfiah leh niin heng atang hian hri kai 885 hmuh leh an ni a, Sample enfiah atanga zaa 9.65 te chuan hri an kai a ni.

Nimin khan Serchhip District-ah African Swine Fever (ASF) vangin Vawk 25 a thi leh a, Serchhip District-ah ASF vangin Vawk 2911 a thi ta a ni.

Hri leng vanga inkharkhip kalpui laia Govt. Serchhip College Boys Hostel rawktu nia hriat chu Serchhip Police ten chhuichhuakin a thil ruk te pawh hmuh let a ni bawk.

Serchhip Bukpui atanga East Lungdar-a kawlphetha pekna Line tihchangtlunna tur, 132kV Line chu nimin khan enchhin niin hman chhunzawm mai theih tawh tura ngaih a ni a. He Line hi hman theih tura khawl dang peihfel a nih hunah chuan Khawzawl thlenga kawlphetha pekna leh lakna atan hman tangkai theih a ni dawn a ni.

MP in CMRF-ah vbc. 2 chhung

Health Minsiter Dr. R. Lalthangliana chuan niminpiah khan khum 100 awm theihna tur Mamit District Hospital sak mek chu a tlawh.

Mizoram Legislative Assembly Speaker, Lalrinliana Sailo chuan niminpiah khan a bial chhung Khawruhlian leh Hmunnghak khua te tlawhin tunhnaia ruahsur nasa avanga hmun hrang hranga leimin leh lei tawlh te a hmunah a en.

Mizoram leh Assam ramri buaina a hmuna thil awmdan hrechiang tura rawn kal, Phailam Journalist thenkhat te chuan nimin khan Aizawl Press Club tlawhin MJA Member te nen inkawmna an nei.

Medical Operational Team (MOT) leh Indian Medical Association (IMA)-te chuan nimin khan Mizoram ramri-a Duty Police te tlawhin, damdawi leh thildang, hri venna atana thil tangkai turte an hlan.

Mizoram Pradesh Youth Congress Committee (MPYCC) leh National Student Union of India (NSUI) Mizoram OB te chuan Assam Chief Minister Himanta Biswa Sarma chet dan leh Assam-in NH. 306 an dan pin avanga lungawi lohna nimin khan lantirin India President hnenah lungawilohna an thlen bawk.

Home Minister Lalchamliana chuan tharum thawhna hmanga buaina chinfel chu thil tha ber a nih loh thu a sawi.

Gauhati High Court, Aizawl Bench chuan Mizoram sawrkarin chhim bial-in RT-PCR khawl a mamawh lo nia Gauhati High Court-a thu a thlen chu pawm lovin, nimin atanga chawlhkar khat chhunga RT-PCR din tur Committee din turin Mizoram sawrkar chu a hriattir bawk.