Chanchin thar lawrkhawm :

Speaker hovin thukhawm

Kumin May 10-a Mizoram Legislative Assembly kum 50-na (Golden Jubilee) lawm dan tur ngaihtuahin nimin khan Organising Committee chu Chairman leh Assembly Speaker Lalrinliana Sailo hovin Assembly Secretariat Recess Room A-ah an thukhawm a, he hunah hian Golden Jubilee lawmna tura ruahmanna hrang hrang te thlir hovin inbuatsaihna kalpui dan turte sawiho a ni. Tun tum hi Organising Committee thutkhawm vawi 3-na niin Home Minister Lalchamliana leh Parliamentary Affairs Minister TJ. Lalnuntluanga te bakah Mizoram Assembly Speaker hmasa ber Dr. H.Thansanga leh Speaker lo ni tawh Dr. Kenneth Chawngliana te, MLA leh MLA lo ni tawh mi engemaw zat leh Chief Secretary Dr. Renu Sharma te pawh an tel a ni.

MJA te hriselna enfiah sak

Civil Hospital Aizawl chuan kumdanga an lo tih tawh thin angin nimin atang khan Mizoram Journalists' Association (MJA) General Hqrs. a member te tan a thlawna an hriselna enfiahna hun an buatsaih leh a, an President Zonunsanga Khiangte chuan kum 2009 vel atanga kum khat leh a chanve vel zel anga Civil Hospital Aizawl-in MJA member-te tana a thlawna inentirna a buat-saih thin chu an lawm hle tih a sawi a ni. Nimin a ni khatna ah khan MJA member mi 30 te an inentir a, Test leh investigation hrang hrang tih sak an nih hnuah inenkawl zui dan tur Medicine Department-in an ruahman sak leh a, tunkar Inrinni thleng neih chhunzawm a ni ang.

Raltlan chungchang sawiho

Nimin khan Champhai-ah District Level Committee on Myanmar Refugees thutkhawm neih a ni a, he hunah hian raltlante ID Card pek tur chu India khua leh tui nihna tur ni lovin, raltlan dik tak, India rawn bela rawn tlante tana inkaih-hruaina mumal zawk siamna tur a nih thu leh India ram an rawn belh chhan ang ngeia ram dan leh inkaih-hruaina siamte tha taka an zawm theihna tura dan leh hrai inzirtirna neih a nih dawn thu te tarlan a ni.

ZPM in MNF zawhna an zawt

ZPM Party chuan nimin khan thuchhuah siamin nikum Nov. 25-a Assam House, Chanak-yapuri, New Delhi-a Assam Chief Minister Himanta Biswa Sarma leh Mizoram Chief Minister Zoramthanga-ten zanriah an kilhona thu kal zelah a puangzar hmasatu phai lam chan-chinbu sawi lang ngam lova a lo sawi chhawngtu ZPM PAC Member pakhat leh Mizoram Media hminghmerh meuha bei-ah MNF Party puhin mak an tih thu an sawi a, “Hetiang taka Mizoram CM puh hmingchhetu Barak Bulletin lakah hian MNF Party hian hma a la ve ngam dawn em?” tiin an zawt nghal bawk.

BJP in Dampa bial an tlawh

BJP Mizoram Pradesh President Vanlalhmuaka chuan nimin khan Dampa Bial-a khaw thenkhat te tlawhin tunlai hrileng vanga harsatna an tawh te a hmunah a enpui a, COVID-19 hri leng thawh thumna thleng mek chuan thingtlang khua pawh a luhchilh nasa hle tih sawiin, sawrkar chu thingtlang lam te tana chhawmdawlna awm thei ngaih-tuah sak tur leh an harsatna te a hmunah hriatpuia damdawi leh an mamawh te ngaihtuah sak turin a ngen a ni. He hunah hian Lungphun khua VLTF te hnenah Covid Test Kit Box 4 (100 piece) leh VLTF te tanpuina Rs. 5000/- pein Lungphun VCP hnenah an hlan a ni.