Chanchin thar lawrkhawm :

Lawngtlai DISHA thukhawm

Lawngtlai District Development Co-ordination and Monitoring Committee (DISHA) thutkhawm chu nimin khan an Chairman leh Lok Sabha MP C. Lalrosanga hovin Video Conferen-cing hmanga neih a ni a, Lok Sabha MP chuan COVID-19 hri leng kara Lawngtlai District chhunga hmasawnna fawng vuantu department hrang hrangte hna thawh chu tha leh lungawi-thlak thawkhat viauva a hriat thu sawiin, department hotute hnenah lawmthu a sawi a. An thlen chinah duh tawk mai lova, thahnem ngai leh chak zawka hna thawh zel tum turin a chah a ni.

Tourism Minister in kawm

Tourism Minister Robert Romawia Royte chuan nizan hmasa khan Union Tourism, Culture leh DoNER Minister GK. Reddy chu hmuin Tourism Ministry-in Mizoram tana sum instalment pekchhuah tur a la neih te pechhuak thuai turin a ngen a. Hei bakah hian a thuphunga sanction tawh, PRASAD Scheme pawh release vat a nih theih nan projects hmunhma te rawn endik tura Inspection Team rawn tir thuai turin a ngen bawk. Minister hian sawrkar laipui-a mi pawi-mawh dangte pawh kawmin Ministry of Tribal Affairs Secretary chu Archery Centre of Excellence din dan tur leh Zo Kutpui leh Mizoram State Games chungchangte a sawipui bawk.

Ralvawng tuilakna hawng

Lunglei District-a Ralvawng khaw tana Ni zung chakna hmanga Tui lakna, Ralvawng Water Supply Scheme chu nimin khan Lunglei HPC Vice Chairman Lawmawma Tochhawng chuan hawng a, cheng nuai 270 senga siam Ralvawng Water Supply Scheme chu mi 489 chawm thei tura duan niin kum 2049 thleng hman theih tura ruahman a ni a, tui hi Uilui atanga lak niin M/s P&V Engineers Pvt. Ltd .ten he hna hi an thawk a, kum nga chhung an enkawl hnuah Ralvawng WATSAN Committee te kutah hlan a ni dawn a ni. He tuilak hna hi nikum July 1 khan thawh tan a ni.

A huho in chawlh la tan

Mizoram sawrkara a nghet lova thawk, Provisional Employee's Association of Mizoram (PEAM) Member mi 8500 chuang te chuan a ngheta an thawh ve theihna tur sawrkarin sum renchemna (Austerity measure) changchawia a danna a la phelh loh avang leh an thilphut dang avangin nimin khan a huho in chawlh an la a, Vawiin pawh hian chawlh hi an la chhunzawm leh ang.

Governor hnenah thlen

BJP National Secretary (Minority Morcha) Delson Notlia chuan nimin khan Mizoram Governor Hari Babu Kambhampati chu Raj Bhavan-ah hmuin Mara Autonomous District Council hnuaia khua 46 a tlawhna-a a thil hmuh te a thlen a, Siaha District in harsatna an neihte a saiwpui nghal bawk. He hunah hian Dr. BD. Chakma MLA pawh a tel bawk a ni.

MLA in hnathawh enfiah

Mamit bialtu MLA leh Road & Infrastructure Development Board  Vice Chairman Er. H. Lalzirliana chuan nimin khan Tlawng Lei dawh mek leh NH44(A)/108 siam mek chu a hmunah kalin a endik a, hnathawktu Company te chu tha tak leh chak taka hna thawk turin a chah a ni. Tlawng Lei dawh mek hi cheng vbc. 36.99 senna tur niin NH44(A)/108-ah hian Teirei Lei dawh bakah kawng siam tur tlem ala awm a ni.