Chanchin thar lawrkhawm :

Champhai-ah chawimawi

Nimin khan Champhai District chhunga kut hnathawktu hlawhtling mi 10 te leh thisen pe hnem ber te hnenah chawimawina hlan an ni a, hemi puala inkhawm Champhai Circuit House-a neih ah DC Maria CT. Zuali chuan kut hnathawktu ten thawhrimna leh sawrkar thupek chhuahte an zawm thin avangin hlawhtlinna ropui tak an chang tih a sawi. He hunah hian kut hnathawktu mi 10 te hnenah thuziak leh pawisafai hlan niin an District-a thisen pe tam ber PC. Lalchuangkima (76), Bethel Veng te hnenah thuziak hlan a ni bawk.


Science Week Festival hmang

Ramchhung hmundangte rualin Science Week Festival ‘Vigyan Sarvatra Pujyate’ chu nimin khan Aizawl-ah pawh  Innovation Facility Centre Auditorium-ah hman a ni a, he hunah hian Prof. R. Lalthantluanga, Former Vice Chancellor, MZU chuan ‘From the Annals of History of Science’ tih thupui hmangin Mizoram-a Science than chhoh dan leh sulsutute chanchin a sawi a ni. He Festival-ah hian Zopa tualchher kut themthiamna neiten an kutchhuak hmuhnawm tak tak an phochhuak a ni.


MBSE in result tichhuak dawn

Mizoram Board of School Education (MBSE) chuan Vawiin February ni 23, 2022 (Nilaini) chhun dar 12:00 hian Diploma in Elementary Education Examination, 2021 (December) result chu tihchhuah a tum a, Result hi MBSE website-www.mbse.edu.in-ah a duh apiang tan en theih in a awm dawn a ni. COVID-19 hrileng avangin result hi MBSE Office-ah erawh tarchhuah a ni dawn lo thung tih sawrkar thuchhuah chuan a tarlang bawk.


Enkawl theihna ti danglam

State Level Expert Team on Covid-I9 Management (SLETOCOM) in rawtna a siam angin nikum July 7-a Covid Care Centre-a damlo te enkawl dan tihchhuah chu tih danglam a ni a. Hemi ang hian COVID-19 hri kai, naupaite chu natna benvawn - BP sang, Zunthlum, Lung natna, Chuap/Thin leh Kal tha lo, Thluak lam natna leh a dangte vei an nih loh chuan Inkaihhruaina dinglai zawm chungin mahni In-ah inkhung hran (Home Isolation) theih a ni ta a, hei bakah hian Covid-19 natna veite enkawlna hmunah te an awm thei bawk ang. Taksa-a natna hri kai lanchhuahna an neih erawh chuan rang takin Doctor/Medical Team an hrilh/rawn nghal tur a ni thung ang.

Comments

Popular posts from this blog

Tukverh-a tlasual boral