Mizoram-a Supply Centre 121 zinga 21 te chu sak that mek a ni

Mizoram sawrkar-a Supply Department chuan Mizoram pumah Supply Centre 121 nei mekin, chung zinga 21 chu sak that mek a ni.

Food, Civil Supplies & Consumer Affairs Minister K. Lalrinliana chuan nimin khan Hmuifang leh Chhipphir-ah te Department hmalaknaa NABARD loan hmanga sak thar Supply Centre - Kudam leh Quarter te a hawng a, heng Supply Centre hawnna hunah hian Supply Minister chuan an Sawrkar tirh a Department mawhphurna a lakin Supply Kudam tam tak chhe tawh lutuk leh a hul that loh avanga buhfai chhe thin chu ngaimawhin a sak that dan kawng hrang hrang a dap dan te a sawi a. Chung Kudam sak that ngai 65 atangin 10 sakna tur chu kum 2019 khan Central Sawrkar atanga hmuh a nih thu te, a bak 21 sakna chu NABARD loan atanga hmuin sak mek a nih thu te a sawi a, Mizoram pumah Supply Centre 121 an neih zinga NABARD loan atanga sak zinga hawn hmasak ber nimin-a hawn tak Hmuifang Supply Centre hi niin Godown thar hawn tak te leh nakin lawka hawn mai tur a dang 19 te chuan mipui mamawh ber buhfai him leh hul taka chhekkhawlna kawngah mipui tan a tangkai lehzual dawn tih a sawi bawk.

Supply Minister chuan Mizoram hmun tam taka kawng sial mek anih avangin kum danga Kudam 50 vela Fur daih tur buhfai chhekkhawl chu kuminah chuan Kudam 70 velah Monsoon Stock dah a ngai dawn tih sawiin, dah mek a nih thu a sawi bawk a. Thla tin Sawrkarin mipui hnenah buhfai quintal 1,50,000 vel a sem thin thu sawiin, BPL leh AAY bakah Scheme dangte pawh a awm thu leh, Open Market Price atangin engemaw zat an lei bawk tih a sawi a. Sawrkar chuan Mizoram tharchhuah buhfai chu OMP a lei a duh vek tih pawh sawiin, “Mahse lei tur kan hmu mang lo, kan ei tur buhfai kan la tharchhuak tlem lutuk hi a lungchhiat thlak a, tan lakna tur a tam hle a ni,” a ti bawk. Minister chuan ei leh bara intodelh a pawimawh zia leh chumi atana buhfai tharchhuah tam chu kawng pawimawh tak a nih dan te sawiin, Oil leh Gas mamawhna sang zel phuhruk nan Oil Depot hmun tur te leh LPG Bottling Plant tihlen te chu Sawkarin a ngai pawimawh thu a sawi bawk a ni.

Nimin-a hawn tak Hmuifang Supply Centre-ah hian buhfai Metric Tonne 200 dah theihna Kudam bakah Store Keeper leh Chowkidar Quarters Building (chawng hnih) te leh Toilet Block te sak a ni a, a vaiin cheng nuai 140 bawr vel seng a sak a ni a. Chhipphir Supply Centre pawh hetiang tho a sak a niin cheng nuai 156 vel a ni. Heng Supply Centre 21 te hi Babie Construction & Consultancy Services sak niin, a project pumpui hi cheng vbc. 39.61 hu a ni a. Kudam tam zawk chu March 2022 ral hmain sak zawh an beisei a ni.