Mizoram-a BJP Office Union Minister in a tlawh

Mizoram-a rawn zin Union Minister of State for Rural Development & Steel Faggan Singh Kulaste chuan nimin chawhnu khan Aizawl-a BJP Office chu tlawhin an Party hruaitute nen in-kawmna an nei.

Union Minister Faggan Singh Kulaste hi BJP Office President Chamber-ah an Party hruaitute nen inkawmna nei hmasa in he hunah hian Mahila Morcha President F. Lalremsangi chuan Mizoram Sawrkar in Central Scheme an kalpui dan diklo te report a pe a, Lehkha ziaka thehlut turin Minister hian a hrilh a ni.

Hemi hnu hian an Party mipuite hma ah thu sawiin kum 2014 atanga chhutin Mizoram a Sawrkarna lo chelh tawh te hian Mizoram chu an ngaihthahin enkawltu neilo ang mai in an kai-hruai a ni tih a hriat theih tih a sawi a, “Nimah-sela tunah PM Modi a kaihhruai Sawrkar kan neih hnu ah erawh nasa takin mirethei te hnen thleng phak hmasawnna kan hmu zel hi a lawmawm a ni,” a ti. Mizoram in Central-a Matching Share tur a neih loh vang leh UC an thehluh theih loh avangin Mizoram Sawrkar chuan sum a dawn tur ang a dawng thei lo nia sawi bawkin, hei hi a pawi hle tih a sawi a, “Mizoram hi Central chuan an ngai pawimawh em em a, nimahsela State Sawrkar berin a tih tur a tih theih loh vang hian ngaihpawimawh tur angin kan ngaipawimawh thei lo a ni,” a ti bawk.