Union MoS for Rural Development in Mizoram-a RD Department hotute a kawm

Union Minister of State for Rural Development Faggan Singh Kulaste chuan nimin khan lehlangin Mizoram a rawn tlawh a, Mizoram Larsap Dr. Hari Babu Kambhampati chu a kawm bakah Rural Development Department hotute chu thutkhawm a neihpui nghal a ni.

Union Minister of State for Rural Development Faggan Singh Kulaste hi Lengpui Airport-ah Tourism Minister Robert Romawia Royte leh Official dang ten lo dawngsawngin Raj Bhavan a pan nghal a, Mizoram Governor Dr. Hari Babu Kambhampati nen inkawmna an nei a ni.

Hemi hnu hian Aijal Club Conference Hall-ah Rural Development Deparment hotulute thutkhawm neihpuiin Department hnathawh an thlirho a, he hunah hian Rural Development Department Secretary Vanlalngaihsaka leh a thawhpui ten Department in Central Schemes hrang hrang an kalpui mek- Mahatma Gandhi Rural Employment Guarantee Scheme (MGNREGS); Pradhan Mantri Awaas Yojana – Grameen (PMAY-G); Shyama Prasad Mukherjee Rurban Mission (SMMRM); Border Areas Development Programme (BADP); Pradhan Mantri Krishi Sinchayee Yojana (PMKSY); National Rural Livelihoods Mission (NURM) leh Deen Dayal Upadhaya Grameen Kaushalya Yojana (DDU-GKY) a an thlen chin, an hmabak te leh harsatna an tawh an tarlang a, zawhna leh hriatchian duh a neite chu Department hotuten an chang a ni.

Union Minister Faggan Singh Kulaste chuan Department in thingtlanga mipui te tan hmasawnna hna hrang hrang an thawh bakah thingtlanga mipuiten eizawnna kawng dang dang te an neihve thei nan eizawnna siamsak thei ang chi Scheme te ngaipawimawh turin a chah a. Hemi kawngah hian Self Help Group (SHG) te chu thil tangkai tak a ni thei tiin SHG te chu nasa lehzuala chawilarna ah tan la turin hrilh a. Thingtlang miten thla bi a sum lakluhna kawng tha an neih theih nan Central Scheme hrang hrangte chu tangkai thei ang berin hman thin a duh thu a sawi a. MNGREGS hnaa Third Party Audit endikna chu ngaihpawimawh nise tiin a sawi bawk.

He huna tarlan a nih danin MGNREGS-ah hian khaw 858-ah Job Card Holder 2,07,875 a awm mek a, District zawng zawnga ni 90 aia tam inhlawh na siamsak tawhin March thla ralhmain ni 100 inhlawhna siamfel beisei a ni a. MGNREGS hnuaia hna te Geo-Tagged kawngah Phase I-ah Mizoram chu State zinga titha ber a ni. SPMRM pawh Mizoram-a RD Block 4-a Cluster 4-ah kalpui mek niin Aibawk Cluster-a hna te chu zawhfel tawh niin Thingsulthliah, East Lungdar leh Khawzawl Cluster te chu hna a kal mek a. Aibawk Cluster chuan SPMRM-ah National Level-ah Award an dawng a. BADP pawh RD Block 15 a kalpui mek niin Myanmar ramri depa awm khua 108 leh Bangladesh ramri depa awm khaw 142 te a huam a. PMKSY hi RD Block 18 a kalpui tum mek niin ram hectare 44,600 a huam dawn a ni.