PC Party thuchhuah thu belhchian dawllo a ni -MNF

MNF Party chuan P&E Department in tul miahlo leh mamawh miah lova thawktu mi 973 lai mai nei anga PC Party-in thu an chhuah chu thubelhchian dawnllo niin an sawi.

Nimin a thuchhuah an siamah MNF Party chuan tunhnaiah PC Party chuan thuchhuah siamin Power & Electricity Departmemt-a thawk mi 973-te avangin thla tin Electric Bill a pung zel ti a an tarlan thu tarlangin, hei hi thu diklo a nih thu leh P&E Department-a post sanctioned zat chu Regular Staff (sanctioned) 2177, PE etc. 1846., Contract Employees 43 leh Worked Charged Staffs 388, a vaiin 4454 a ni tih an tarlang a. “Hetiang hi kan mamawh zat an nih laiin sawrkar in post fill-up leh creation a khap avangin tih theih a ni lova, tuna kan dinhmun (present strength) chu Regular Staff 1283, PE etc. 1846, Contract Employees 43 leh Workcharged Staff 388, a vaiin 3560 an ni,” an ti a. “Sanctioned post leh tuna kan dinhmun en hian P&E Department chuan tul miah lovin mi 973 a ruai ni lovin, sanctioned posts atangin mi 894 fill up loh a awm zawk tihna a ni,” an ti.

Heng bakah hian assets neih zat te a lo pun zel avangin a enkawltu tur Staff mamawh belh a ni zawk tih pawh MNF thuchhuah chuan tarlangin, P&E Department hian Lines KM 11428, Grid Sub-Stations 73, Hydel Project 11, Distribution Transformers 2701 leh Consumers 256,092-te a enkawl mek tih an sawi a. Heng bakah hian hmasawnna atana hna hrang hrang (on-going works)-te pawh a enkawl tel bawk nia sawiin, “Heng te hi tha taka enkawl tur chuan Staff 4454 bakah Staff 952 a mamawh belh zawk a ni,” an ti a. Tunah hian Staff indaihlohna avangin khaw 249 laiah duty dah an ni lo tih pawh sawiin, Grid Sub-Station tinah hian darkar 24 chhungin a tlangpuiin mi 9 in-duty chhawktir tur a ni a. Mahse, Staff indaihlohna avangin Sub-Station tam zawkah mi 2/3 lekte a inchhawkin an duty thin zawk niin an sawi bawk.