Latest News

Serchhip DHO kalchhuak tur leh awm thar tur ten Serchhip-a MJA member te an kawm

Serchhip District Horticulture Officer (DHO) kalchhuak tur M. Vanlalzami chuan nimin khan Serchhip-a MJA member te leng-ah sawmin DHO thar tur R. Lalnuntluanga te nen inkawmna an nei a ni.


Serchhip DHO Office-a inkawmna ah hian DHO kalchhuak tur M. Vanlalzami chuan an Department hmalakna hrang hrangte tarlangin, an hmalakna tam ber chu Central Scheme, Mission for Integrated Development of Horticulture (MIDH) atang anih thu sawiin, Serchhip a Horticulture Crop a tam thei ang ber tharchhuah leh quality tha thei ang bera tharchhuah chu an tum lian ber a ni tih a sawi a, an hmalakna thenkhatah chuan thlai tharchhuaktu ten a hralhna lama buaina an tawh thin avangin a hralhna lam thlenga tan an lo lakpui ve thin thu te, Serchhip Mat Phai-a thlai chingtuten man man zawka an thlai an hralh theihna turin kawng tam taka hma an lakpui thu te a tarlang a ni.

DHO kalchhuak tur M. Vanlalzami chuan Serchhip a a awm chhungin MJA te nen thawhona tha tak an neih thu sawiin, chu chuan nasa taka rah tha a chhuah thu leh hmasawnna hmuh tur a langchhuak tih a sawi a, DHO thar te nen thawhona tha tak nei zui zel tura a duh thu a sawi bawk.

Serchhip DHO thar tur R. Lalrintluanga pawhin Mizoram-a Horticulture Officer tha berte zinga ami thlaktu tur nih chu thil huphurhawm tak a ni tih sawiin, Serchhip alo thlen hnuah Mat Phai a tlawh tawh thu te leh hmasawnna nasa zawk awm thei tura hmalakna ah Department leh Chanchinbu mite chu an pawimawh dawn tih a sawi bawk a ni.

He inkawmna ah hian MJA Serchhip District President C. Lalhminghlua chuan Serchhip DHO chhuak ta M. Vanlalzami chu Serchhip-a kuthnathawktute hmasawnna rawn thlentu, a bikin tunhma lama te tak te te ni thin Tomato lian tha leh hrisel tak rawn thlentu leh Dawnfawh pawh hralh tlak, lian pui pui rawn thar tirtu a ni tih sawiin, a hnathawh chu kuthnathawktu ten an hrechiang tih a sawi a, hetiang Officer tha hi an ui thu leh a kal zelna turah erawh duhsakna an hlan thu a sawi a. DHO thar C. Lalrintluanga pawh Serchhip-a kuthnathawktute malsawmna thlentu ni turin thinlung takin an lo lawm thu sawiin, Chanchinbumi ten a hnathawhna turah thawhpui an inhuam reng tih a sawi bawk. He inkawmna ah hian MJA member te bakah Serchhip DHO Office-a thawktu pawimawh te pawh an tel bawk a ni.

Comments

Popular News (Last 30 Days)