Chhiah thar lak emaw, Chhiah tihpun tumna emaw a awmloh thu Chief Minister in a sawi

Finance Minister Zoramthanga chuan Chhiah thar lak emaw, Chhiah tihpun tumna a awm loh thu a sawi.

Kum 2022-2023 Mizoram Budget nimin-a a pharh zawhah Finance Minister hian Assembly House Annexe Building-ah thuthar thehdarhtute kawmin Budget pharh taka kum hmasa budget-a Chhiah (Tax) atanga hmuh beisei zat a pun chhan chu chhiah lak tur tihpung tumna vang a nih loh thu a sawi a, amaherawh chu sawrkar laipui atanga thu a dang a nih chuan thuhran a nih thu sawiin, “Chhah tihsan pawh ni chuang loin, a khawn dan te, a khawntute active lehzualin, a petu tan pek dan awlsam lehzualin kal chho ila, kan resource hi nasa takin kan mobilise thei anga tih a ni. Chu chu kal tum dan a ni,” tiin, chhiah tihpun lam a kawh loh thu a sawi a ni.

Budget pharh takah sorkar kum tharah hian RBI atanga Ways and Means Advance (WMA) hi Rs. vbc. 1,000 tling tura chhut a nih chungchang chu sorkar invenna vang a nih thu an sawi bawk.

Chief Minister hian SEDP Fund dawngtu turte chu veng, khua, State leh district-ah thlanchhuah an nih tur thu a sawi a. SEDP Fund hmu turte chu Trade an thlan an tihhlawhtlinna tura pek an nih tur thu sawiin, “A tlangpui thuah chuan, a bul tanna Rs. 50,000/- kan pe ang; amaherawh chu, First Batch-ah pawh thenkhat chu pek belh an awm dawn,” a ti a. Mipuiin hma an lak theihna turin Selection Committee in an tih ang pek a nih tur thu a sawi.

Sawrkar budget thara ram hmasawnna ruhrel, ram tana rotling (asset) siamchhuahna chungchangah, hmarchhak State zawng zawng hian sawrkar laipui atanga an hmuh hi a tam ber tih a sawi a. “North-East State te hian kan tih kan tih theih chin hi chu tlem a, kan kal ve ngawr ngawt vek mai a. Chuvangin, tunah pawh hian sawrkar laipuiin hemi atan cheng vbc. nuai khat an dah a. Engemaw zat pawh kan asset siam nan hman theih ngei kan tum a. Capital expenditure pawh tihsan chhoh zel kan tum a ni,” a ti.

Kamrula tia hriat lar chungchangah zawhna chhangin Chief Minister Zoramthanga chuan, “Kamrula hian contract a hmu teuh a, Kamrula lo pawhin a hmu teuh bawk. Tunah hian PWD-a First Class Contractor kan neihte hian hna engemaw zat an thawk a. Tlang takin sawi ta ila, an hming kan hawh a ni,” tiin, hna a tak taka a thawh vek pawh a nih loh thu a sawi a. “Tun hma pawhin hming hawhin kan thawk tam em em a. Kamrula pawh kan duhsak bik a, kan duhsak lo bik pawh a ni lo. A thawktu hmingah an lo hmang a, chutia kal chho a ni a, a dang pawh mi thawh hi a tlar thui khawp mai,” a ti bawk.