Union Defence Minister hova Sainik Board of Governors Meeting-ah Chief Minister a tel

Sainik Board of Governors Virtual Meeting chu nimin khan Union Defence Minister  Rajnath Singh hovin neih a ni a, he hun hi Mizoram atangin Chief Minister Zoramthanga leh Education Minister Lalchhandama Ralte te chuan CM Office atangin an chhim a ni.

He Meeting ah hian Chief Minister Zoramthanga chuan Mizo zirlai tam takin Sainik School an chhawr tangkai thu leh lian zawka he Institution hi a than chhoh zel a duhsak thu a sawi a. National Defence Academy leh Naval Academy a luh tum leh duh te buatsaihna tha tak Mizoram in a nei chu lawmawm a tih thu sawiin, discipline inzirtir kawngah te leh Co-Curricular Activities tha tak tak kalpui a ni thin chu lawmawm a tih thu a sawi bawk.

Nimin-a Sainik Board of Governors' Meeting-ah hian thu ngaihtuah tur hrang hrang chhawpchhuahte sawiho a ni a. Chung zingah chuan Sainik School din belh leh School dinna tur ram neih belh chungchang te, Board of Governors Member tihpun leh a dangte a tel a. An thurel hrang hrang chu State tin ten an ngaihdan leh sawi belh duh an neih chuan ni sawm (10) ralhma in ziaka sawrkar laipuia thlen turin member-te an inhrilh a ni.

Sainik School inrelbawlna hi Autonomous body hnuaia enkawl niin, Defence Minister kaihhruai Board of Governors chu a enkawltu rorel sang ber a ni a. Chief Minister leh Education Minister te member zingah an tel a. Local Board of Administration awm lehin anni hian School hmalak zel dan turah ruahmanna siam turin hunbi neiin an inhmukhawm thin a ni.

Mizoram-a Sainik School, Chhingchhip hi April ni 21, 2017 khan din a ni a. National Defence Academy leh Naval Academy-ah an luh theihna tura mipa naupangte buatsaih chu a tum ber a ni a. Kum 2018-19 Academic Year atan hmeichhe zirlai admit tan niin, ram chhung Sainik School zinga hmeichhia te tan Admission pe hmasa ber a ni.