Sawrkar hnathawk inzawmkhawm pawl ten lungawiloh lantir nan Bagde dum bel an tum mek

Mizoram-a sawrkar hnathawk inzawmkhawm pawl, Federation of Mizoram Government Employees & Workers (FMGE&W) chuan lungawi lohna lantir nan leh an thil ngiatte sawrkarin a tihhlawhtlinsak thuai phut nan tun thla ni 21-25 chhung khian Badge dum bel an tum tih an sawi.

February 11, 2022-a Conference Hall, Directorate of Economics & Statistics, Aizawl-a FMGE&W hruaitute thukhawm chuan Dearness Allowance (DA) pung chungchang te, hlawh pek tlai chungchang te, Pension leh Retirement Benefits dang pek tlai chungchangah hmalak sak tura vawi tam an thlen chung pawha hlawhtlinna an hmuh loh avangin, February 21-25, 2022 chhungin Badge dum bel turin thutlukna an siam a. Zawhna chhangin FMGE&W General Secretary J. Ramdinmawia chuan, “DA hi kan Pay Rules hman mekin a ken tel notification (No. G.12011/2/2017-FIN(PRU) Dt. 16.8.2018) anga Central sawrkar hnathawkte rate hman ang hi kan phak lohna a nasa tawh a, hemi chungchang hi kan dil thin a. Kan hlawhtling hlei thei lo a, a beidawnthlak riauin kan hria,” a ti.

Sawrkar hnathawkte hlawk lak tlai chungchang pawh vawi engemaw zat sawrkarah an thlen tawh thu a sawi a, “December 2020 atangin a hunah kan la hleithei lo,” tiin, Supreme Court-in sawrkar hnathawkte chu an chanvo a nih ang taka a hun taka hlawh pek thin tur an nih thu leh pek tlai an nih pawhin interest nen pek an nih tur thu a lo tichhuak tawh tih a sawi a. “Sawrkar hnathawk an han chawl (retire) a, anni pawh hi pek tur sa vek an ni a, an chanvo a ni. GP Fund phei chu a hranpaa hlawh atanga khawl liau liau a ni a. A dang, Retirement Benefits te hi chu Rules angin sawrkarin a pek tur a ni. He'ngte pawh hi an hren khawtlaisak thei lutuk hi a pawi kan ti,” a ti bawk.

Sawrkara an thil ngiat pathum hi vawi tam ziak leh tawngka hmangin an thlen thin a, an hlawhtlin theih si loh avangin, lungawi lohna lantir turin Committee-in a rel tih sawiin, “A chuang liam va dil kan ni lo a. Kan thil ngiat pathum hi Rules-in kan chanvo tura a sawi sa vek an ni,” a ti a. Badge dum bela lungawi lohna an lantir bakah, a tul angin zau zawkin an kal zel dan tur rel an tum tih a sawi a. Hri leng vanga punkhawm tam khap a ni a, pawl aiawh member zawng zawng inkokhawm lovin, aiawh pakhat theuh emaw in tir a, SOP bawhchhe lo thei ang berin March 1, 2022 khian Council Meeting koh an tum thu a sawi bawk.