Kum 2021-2022 ah SEDP atangin Department-ah cheng vbc. 83.39 pek a ni tawh - Governor

Mizoram Governor Dr. Hari Babu Kambhampati chuan hrileng avangin sawrkar chuan harsatna hrang hrang tawk mahse, sawrkar chungah rinna a nghat tlat tih sawiin, sawrkar kum kal mek 2021-22 ah SEDP atangin cheng Vbc. 83.39 chu Department hrang hrangah hmasawnna hna thawh nan pek a ni tawh tih a sawi bawk. 

Nimin-a Mizoram Legislative Assembly Budget Session tan ni-a House chhunga thu a sawiah Larsap hian, Budget Session tan tak chu 2022-23 atana Mizoram Budget ngawng tur a nih avangin House rorel chu tluang leh tangkai taka kalpui a nih a beisei tih a sawi a, Member te chu House zahawmna kengkawng tlat tur leh mahni mawhphurhna leh tihtur leh tih loh tur te hre thar a, rah tha tak chhuah tur sawihona nei turin a sawm a ni. Governor chuan Mizoram Sawrkar-in Sawrkar laipui thlawp leh rin a hlawh chho zel a, rawtna leh ruahmanna hrang hrang an thlen te a hlawhtlin zel beisei a ni tih sawiin, tun thla ni 2-a Union Finance Minister-in Union Budget a pharh takah Mizoram tan bik liau liau Aizawl tlak lama Aizawl kawng helna kawng siamna tur cheng Vbc. 500 leh Bamboo Link Roads Pilot Project kalpuina tur cheng Vbc. 100 ruahman a nih thu tarlan a ni chu thil chhinchhiah tlak tak a ni, a ti a. Entrepreneurship Development Scheme hnuaiah bultanna tur nei lote tan an bultanna tur ngaihtuah sak thin a ni a, COVID-19 hri len tirh lamah pawh khan hri laka invenna hmanraw hrang hrang PPE, Hand Sanitizer leh Face Mask tlakchhamte chu he Scheme hmanga tanpuina pek ten rawn phuhru-in a tangkai zia hmuh chhoh a ni tih a sawi bawk.

Dr. Hari Babu Kambhampati chuan, Sawrkar kum kal mek 2021-22 ah State Sawrkar Flagship Programme Socio-Economic Development Policy (SEDP) atangin cheng Vbc. 83.39 chu Department hrang hrangah hmasawnna hna thawh nan pek a ni tawh tih a sawi a. Kum 2021 chung khan Horticulture Department hmalakna hnuaiah a thar hun lova Tomato chinna atangin Quintal 10363.25 lak tawh a ni a, a hralhna chu cheng nuai 597.50 zet a tling tawh a, Tomato hi thar mek zel a nih avangin hei aia tam hi thar ngei beisei a ni, a ti a. Tomato chauh pawh ni lo thlai dang dang thar mek zel niin, nikum thleng khan Vegetable and Fruit Supply Chain kalpui a ni a, hei hi kuthnathawktute tan a that bakah mipuiin nasa takin an hmang tangkai a, Supply Chain kaltlanga kuthnathawktute sum hmuh chu cheng vbc. 3.35 zet tling tura beisei a ni tih a sawi bawk.