Mizoram tan RT-PCR Test Kit 2,16,864 hlan

World Health Organisation (WHO) leh European Union Humanitarian Aid chuan COVID-19 hri pui leng dona kawnga hmanraw pawimawh tak RT-PCR test kit 2,16,864 chu Mizoram tan hlanin nimin khan Health Minister Dr. R. Lalthangliana chuan a dawng a ni.

Nimin a heng Test Kit hlanna puala inkhawm Health Minister Pisa-a neih ah Health Minister chuan WHO leh European Union Humanitarian Aid chungah lawmthu sawiin, COVID-19 hri leng karah WHO hian Mizoram tan Oxygen Concentrator engemawzat an hlan tawh a, nikum-a hri kai kan pun nasat vanglai khan kan mamawh hmanrua chi hrang hrang RAgT kit 3,60,000, Multipurpose Tent 12, Arterial Blood Gas Analyser 10, Oxygen Concentrator 194 min pe in, tunah RT-PCR test kit 2,16,864 lai kan han dawng leh a, PPE kit 5000 dawn tur kan la neih thu a sawi bawk.

Nimin-a RT-PCR Test Kit an hlan hi BGI Health Company, Hong Kong siam a ni a, US Dollar 1,87,200 man niin, India tangka hlutna nena chhut chuan cheng nuai 142 chuang hu a ni.