Ruihhlo dona a hmalak ho dan tur sawihona nei

Ruihhlo laka naupangte himna tura sawrkar kutke hrang hrang ten tangruala hma an lakna tur ruahmanna bawhzui dan tur chungchang sawihona, State Level Review Meeting chu niminpiah khan Aizawl-a Secretariat Conference Hall-ah neih a ni.

Mizoram State Commision for Protection of Childs Right (MSCPCR) buatsaiha he sawihona hi MSCPCR Chairman Dr. C. Lalsangzuala chuan kaihruaiin Mizoram-ah ruihhlo avanga buai naupang an pun chhoh zel avang leh Mizo Hnam tana pawi lian tak la thlen thei tur a nih avangin ruihhlo do kawngah tanrual a ngai tih a sawi a. Ruihhlo dona kawnga kil hrang hranga thawktuten mahni hma zawn theuha hma an lakna te chu rah tha zawk chhuah turin hlawm khata hmalakna te luankhawm tir a pawimawh tih a sawi bawk.

National Child Rights Commission leh Narcotic Control Bureau ten a kaihhnawih Ministry dangte nen thawkho a ruihhlo laka naupangte himna tura hmalak dan tur ruahmanna kimchang an duan, Joint Action Plan, JAP tia sawi-ah India ram-a District 272 thlanchhuah zingah Mizoram-a District pathum- Kolasib, Aizawl leh Champhai te a tel a. Heng District pathum DC te, Mizoram Police, Excise and Narcotics, Health & Family Welfare leh Education Department te bakah naupangte enkawl leh dawmkanna kawnga thawktu sawrkar kutke te chu JAP hnuaiah hian an thawkho mek a ni.

He sawihona hunah hian Department hrang hrang hotute chuan JAP hnuaia hmalak dan tur ruahmanna an bawhzui tawh dan leh an hmachhawpte an sawifiah a. Naupangte ruihhlo laka an himna tura Dan dinglai tha lehzuala kenkawh dan tur te, naupangte ban phaka ruihhlo a awm lohna tura damdawi dawr leh vaihlo zawrhna hmun khuahkhirhna dinglai khauh leh zuala kenkawh dan tur te zau taka sawiho a ni.