Lenkawl

Serchhip leh Thenzawl inkar Zuangleng ram a Balhla atanga Paper, Fibre, Leitha leh Balhla Chips te siamna tur, Common Facility Centre hman theih dan tur chu nimin khan Serchhip District Bawrhsap, Paul L. Khuma hovin sawiho a ni.

Serchhip khawpui chhungah Ui khuahkhirhna chu khauh zawka kalpui chhoh mek niin he khapna bawhzui tura din Team hrang hrangte pawh anmahni huamchhung ah an fehchhuak tan tawh a ni.

Sawrkar laipui hnuaia National Livestock Mission behchhana Animal Husbandry and Veterinary Department leh National Insurance Company (NIC) thawhhonaa kalpui, Animal Insurance-ah ran 4,734 ziahluh a ni tawh a; Vawk thi 332 tan insurance sum Rs. 60,66,400 pek a ni tawh a. Serchhip-ah pawh chhungkaw pahnih chuan Insurance hi an claim mek a ni.

Sawrkar laipui hnuaia naupaite tana hamthatna dawn theihna Pradhan Mantri Matru Vandana Yojana (PMMVY)-ah sawrkar kum kal mekah hian Mizoram-a naupai 3,624 ziahluh an ni tawh.

Kolasib District Bawrhsap H. Dolianbuaia leh Cachar Bawrhsap Rahul Kumar Gupta IAS te chu nimin khan Cachar DC Conference Hall-ah inkawmin October 30, 2026-a Vairengte-a Inter-State Border Festival neih tur chungchang leh thawhhona turte an sawidun a. Vairengte-a Inter-State Border Festival neih turah hian infiamna hrang hrang - Futsal, Badminton, Volleyball leh Table Tennis te buatsaih a nih dawn bakah, hnam lam chi hrang hrang entir a ni anga, ATMA leh MZSRLM atangin Stall hawn a ni bawk ang. Hei bakah hian ramri hrula cheng mipuite ralmuang leh thlamuang taka an awm theihna tur te, ruihhlo dona kawnga tha thlah lova thawhho dan turte leh hmasawnna kawng hrang hranga District pahnih te thawhho dan turte an sawidun bawk. 

Kum 1966 atanga September 8-a hman thin ‘International Literacy Day’ chu a tum 60-na atan nimin khan hman niin Aizawl-ah pawh School Education Department changtu Commissioner & Secretary, K. Lalthawmmawia hovin hman a ni a, Mizoram-a ziak leh chhiar thiam tam lam chu za 99.8 a kai chho tawh tih tarlan a ni.

State Transport Authority (STA) chuan man chawia mipui phur lirthei zingah sawrkar rate aia sang lak ching an awm avangin dan zawm lova tlan luite man chhuah an nih chuan permit tihtawp sak thlenga hmalak sak an ni dawn tih an sawi.