Lenkawl

Nimin khan Serchhip District-a Chhingchhip khua ah African Swine Fever (ASF) vanga Vawk thi chhinchhiah belh leh niin kumin chhung hian Serchhip District-ah ASF vanga Vawk thi 1889 zet a awm tawh a ni.

Kumin July 1-a kum 18 tling chin te laa Electoral Roll siamthat hna kalpuina, Special Intensive Revision (SIR) 2026 chu Serchhip District-ah zawhfel niin nimin khan Final Electoral Roll tarchhuah a ni a, Serchhip District-a Assembly Bial pathum-ah Vote nei thei 54,916 leh Service Voters 352, an vaiin 55,268 an awm a ni.

Nimin khan Finance Department leh Mizoram-a Bank pariat te chuan ‘One Department One Bank’ kalpuina turin inremna an ziak.

Special Intensive Revision (SIR) 2026 chu Mizoram-ah tluang taka zawhfel niin nimin khan Final Electoral Roll tarchhuah a ni a, Electoral Roll thar berah hian Mizoram pumah Vote nei 8,35,869 awmin Service Voter 4,103 an awm bawk.

Mizoram sawrkarin khualkhuaa thite ruang phurh man a tumsakna, ‘Assistance for Transportation of Bodies of Deceased Persons within Mizoram’ kaltlangin ruang 2,949 phurhna atan cheng nuai 311.45 pek a ni tawh.

Food, Civil Supplies & Consumer Affairs Department chuan buhfai-ah thlaphanna tur a awm lo tih an sawi.

Chief Minister Lalduhoma chuan Mizoram chu Digital State-a siam a duh thu leh a tum bawk thu a sawi.

Midangte tana thih hnua Mit pe tura inzirtirna kumtin-a neih thin, ‘Eye Donation Fortnight’ chu India rama a vawi 41-na atan hman leh mek a ni a, nimin khan Aizawl-a Taxation Department Auditorium-ah hemi pual hian hun hman niin H&FW Department Principal Director Dr. Lalthlengliani chuan khuallian niin a hmanpui a. Eye donation chu kan thih hnua kan mit darthlalang (Cornea) midangte tana mit varna a lo nih theihna tura pek a nih thu sawiin, Mizoram-ah pawh July ni 31, 2008-ah Eye Bank hawngin September ni 25, 2009-ah Corneal Transplant hmasa ber chu hlawhtling taka neih a nih thu a sawi bawk.