Pathianni-ah hri kai 577 hmuh belh leh an ni

Pathianni khan Mizoram-ah COVID-19 hri kai mi 577 hmuh leh an ni a, hri kai hmuhchhuah hi tlem deuh mah se Sample enfiah 1789 atanga chhut chuan za zela 32.25 in hri an kai a ni.

Pathianni khan ZMC leh Lunglei-a RT-PCR Laboratory-ah Sample enfiah a awm lova, Aizawl District-ah Fluorescent Immunoassay Test hmangin Sample pakhat enfiah awmin hri a kai a, Serchhip District-ah a hmaa ziahluh lo mi 9 ziahluh thar an awm a, District hrang hranga TrueNat Laboratory-ah Sample 52 enfiah niin hri kai mi 8 hmuh an ni bawk a, Saitual District-ah 5 leh Aizawl District-ah mi pathum te an ni.

Rapid Antigen Test hmangin Sample 1692 enfiah niin hri kai mi 559 hmuh an ni bawk a, an zinga 265 te chu Aizawl District-a hri kai hmuh te niin Lunglei District-ah hri kai mi 93 hmuh an ni bawk a, Hnahthial District-ah hri kai mi 72 hmuh niin Lawngtlai District-ah 41, Serchhip District-ah 38, Saitual District-ah 26, Siaha District-ah mi 10, Kolasib District-ah mi 8 leh Champhai District-ah hri kai mi 6 hmuh an ni bawk.

Nimin khan Mizoram District hrang hrangah hri kai enkawl dam mi 1988 an awm belh ve leh bawk a, heti hian nimin tlai thleng khan Mizoram-a hri kai hmuhchhuah tawh zawng zawng chu 1,96,997 niin an zinga 1,86,504 te chu enkawl dam an ni tawh a, hri kai hmuh tawh atanga za zela 94.67 te chu enkawl dam ni tawhin hri kai enkawllai pawh mi sing khat aia tlem, 9856 an ni ve leh ta a, hri kai zingah mi 637 an boral tawh thung a ni.