Bialtu MLA in Buangpui tlawh

Tunhnaia Serchhip Bial chhunga COVID-19 hri kai hmuhchhuah tamna Buangpui khua chu nimin khan bialtu MLA, Lalduhoma chuan tlawhin an mamawh tur thil chi hrang hrang a pe.

Buangpui khuaah hian mihring 500 chuang deuh awmin, kar kalta Ningani atang khan COVID-19 hri kai hmuhchhuah awmin tun dinhmunah hri kai mi 117 an awm mek a, khawtlang in 4C hmun thum (3)-ah siamin Bialtu MLA hian Buangpui a ri kai te dinhmun leh an mamawh te a zawt a, a theih anga tanpui zel a tum thu a sawi a. Buangpui VLTF leh Health Department Staff te hnenah COVID-19 enkawl nana damdawi hmanraw pawimawh Surgical Glove, Digital BP Check na, Pulse Oximeter, Temperature enna leh PPE Set engemaw zat a pe a ni.

Buangpui tlawhtu Bialtu MLA hi Branch YMA hruaitute pawhin lo hmuin Tuirihiau leh Vantawng Khawhthla inkar Vanva lui a Lawng-leng dah tur an lo dil angin a ngaihtuahsak tur thu a hrilh bawk.

Bialtu MLA hian nimin vek khan Neihloh khua pawh tlawhin Neihloh Branch MHIP te hnenah Thingpui inna No dozen 10 leh mitthi an awm changa an hman tur pangpar a pe bawk.