RD Minister hovin Mizoram-a DRDA te DRDO-a leh chungchang sawihona neih a ni

Sawrkar Laipui chuan tunhnai khan Centrally Sponsored Scheme, District Rural Development Agency (DRDA) Administration Scheme chu April ni 1, 2022 atangin tihtawp a nih tur thu an rawn hriattir a, nimin khan RD Minister hovin Mizoram-a DRDA chu District Rural Development Office (DRDO) ah te leh chungchang sawiho a ni.

Sawrkar laipui hian DRDA tihtawp a nih tur thu a sawi rual hian Zilla Parishad awmna State-ah te chuan DRDA hi he Body a chhunfin a rawt bakah Zilla Parishad awm lohna State-ah te chuan State Sawrkarin a duh angin ruahmanna siam mai se tiin an rawt a. Nimin a hemi chungchang sawihona RD Minister Lalruatkima hova a Pisa-a neih ah hian Minister chuan Sawrkar Laipuiin hun rei tak atanga an kalpui tawh DRDA Scheme chu ram pumah tihtawp an tum avangin DRDA in hna an thawhte chhunzawm zel anih thei nan District-ah te RD Office chu a awm a ngai tih sawiin, DRDA hi tawp mahse hengte hi DRDO-ah letin la kalpui zel chu tha nia Department in a hriat avangin he ruahmanna hi siam anih thu a sawi a. Panchayati Raj zawm State-ah te Zilla Parishad te hian DRDA hna hi la tura beisei ni mah se Hmarchhak State tam zawkin Panchayati Raj kan zawm lova, Zilla Parishad ang te hi kan nei lova, chuvangin DRDA aiah DRDO hi kan mamawh takzet a ni tiin District a RD Scheme hrang hrang khaikhawmtu an awm loh chuan hmasawnna hna hrang hrang thawh a harsa thei nia a hriat thu te a sawi a ni.

He sawihona hunah hian DP&AR leh RD Department hotute chu an Secretary hova telin Department aiawhte chuan thil awm dan leh an ngaihdan te sawiin Post siamrem ngai zat te, Sawrkar sumbawm a nghawng dan tur te, District-a RD Office pawimawhna leh an mawhphurhna te chu zau taka sawiho a ni.

DRDO atana Post tul zual tak tak 22 siam nan Rural Development Department hnuaia sanctioned post hrang hrang 22 pekkir (surrender) tum a ni a, nikum khan DRDA-a Post hrang hrang 84 te chu Mizoram Sawrkar hnuaia dah ngheh absorbed an lo ni tawh a. District 8-ah hian DRDA inrelbawlna chu Project Director (PD) hnuaia awmin Office hmunhma bakah Quarters te pawh a nei vek a, District thar 3-ah erawh DRDA hmunhma tur hi buatsiah mek niin Addl. DC te chuan DRDA Project Director hna hi an kawp mek a ni.