Niminpiah Oct. 10, 2021 kha ‘World Mental Health Day’ niin he ni hi Pathianni a nih avangin Serchhip-ah chuan Zirtawpni khan he ni pual hian hun hman a ni.
Nimin khan Serchhip District-ah COVID-19 hri kai mi 54 hmuh belh niin hri kai mi 69 te enkawl dam an ni thung.
Nimin October 11, 2021-a International Girl Child Day lawmna chikhat atan Serchhip District District Hospital-a nau piang thar hmeichhia te hnenah lawmpui thilpek hlan a ni.
Mizoram Primary Teacher’s Association (MPTA) chuan nimin (Oct. 11, 2021) khan Mizoram-a District pathum ah Myanmar atanga Mizoram-a raltlante tanpuina atan pawisafai leh bungrua hlanin Serchhip-ah pawh Sub-Hqrs. YMA kutah cheng nuai khat leh bungrua thahnem tak hlan a ni.
Pathianni khan Mizoram-ah Sample 1246 enfiah niin heng atang hian COVID-19 hri kai mi 307 hmuhchhuah an ni a, hri kai hmuhchhuah hi tlem mah se Sample enfiaha tanga chhut chuan za zela 24.64 in hri an kai a ni.
Dedicated COVID Hospital, Zoram Medical College (DCH-ZMC)-a khum 10 awmna Intensive Care Unit (ICU) Ward thar chu nimin khan Health Minister Dr. R. Lalthangliana chuan a hawng.
Krismas, Kumthar leh Puja lo thleng turah Halpuah, Halmawi, Silailem mu nei chi leh Sky Lantern te chu mihring hriselna atana thil pawi thei leh COVID-19 hri len lai phei chuan nghawng thalo tak nei thei a nih avangin khap leh a ni dawn.
Tun thla ni 4-a Staff Nurse mi 50 lak chung-changah thil fello a awm avangin Mizo Students’ Union (MSU) General Hqrs. chuan nimin khan ZMC Administrative Staff leh Joining Report pe turte a dang a. Sawrkarin chak zawka thil tisualtu zawnchhuah intiamna a neih avang leh Volunteer te tan duhsakna tha zawk a pek turte ngun taka ngaihtuah a nih hnuah nimin tlai dar 3:00 khan pungkhawm hi an tin thu MSU chuan an sawi.
Mizoram pum-a Hmai tuamna vuah tura hmalakna runpui 'All Mask Campaign' kalpui tur chu nimin khan Health Minister, Dr. R. Lalthangliana chuan ZMC Central Library-ah a hawng a. 'All Mask Campaign' hi October 10, 2021 atanga October 20, 2021 chhungin kalpui a ni ang.