NHM hlawh pek thuai tum; thawktu ten sawrkar kar

National Health Mission-Mizoram hnuaia thawktu te hlawh chu tunkar chhung hian dan thar angin Treasury-ah thehluh a, bill a luh veleh release turin NHM leh Finance Department hotute ten ruahmanna an siam.

Mizoram sawrkar thuchhuah tarlan danin NHM hnuaia thawkte hlawh hi NHM sum, sawrkar laipui atanga dawn atanga pek thin a ni a, kumin bikah hian sawrkar laipuiin CSS (Centrally-Sponsored Scheme) Fund release dan thar a siam avangin 1st instalment hi tunhnaiah dawn chauh a ni. Hei hi Public Financial Management System (PFMS) kaltlanga State Nodal Accounts a chhunluh ngai a ni a, chutianga ti tur chuan tih ngai tam tak a awm a, chungte chu Mizoram lama a thawktu ten theihtawp chhuaha an tihfel vek tawh hnuah, Technical problem pakhat, Delhi Headquarters atanga chinfel ngai a awm a, hei pawh hi a thawktu ten bawhzui reng-in siam that tawh a ni, a ti.

Sawrkar thuchhuah chuan 1st installment hi tunhnaiah dawn chauh ni mah se, Finance Department leh NHM lam hotute ruahmanna in November 2021 thleng hlawh hi lo pek lawk tawh a ni a, tun dinhmunah hian NHM sum hi Treasury ah tâng a awm lo niin an sawi bawk.

Hemi hmalam Zirtawpni khan NHM Employee Union, Mizoram chuan thuchhuah siamin an harsatna hrang hrang a hmalak chhunzawm dan tur chungchang ngaihtuahin Executive Meeting an neih thu an tarlang a. An harsatna an sawi zingah NHM Staff te zingah COVID-19 hri kai te a thlawna enkawlna pek an phut thu phalsak an nih hnuah tun thlengin mahni-a intum tura tih an la nih thu leh COVID-19 Free Treatment for all NHM Staff chu a nih dan tur ang taka hman nghal an phut thu te; thla 2 chuang hlawh la thei lova an awm leh mek thu leh tunkar hi thla thum hlawh an lak lohna tur a nih thu tarlangin, sawrkar laipui atanga NHM sum lo kal NHM Account-a dahluh kawngah tun aia chak zawka tih fel anih theihna tura hma laksak leh kalphung felfai tak siam sak tura sawrkar hotute an ngen thu te; an harsatna chinfelna tura sawrkar-a an thlen te thla 3 chhunga report/recommendation peihfel a thehlut tura August 16, 2021-a Study Team din a nih hnuah thla 6 zet a liam hnu, report/recommendation pawh an peih fel thawkhat tawh ni a kan hriat laia sawrkarin April 30, 2022 thleng an hun a pawh sei sak nia sawi a awm leh tun thleng pawha Study Team report sawrkarin a la dawng lo chu hriatthiam harsa an tih thu an sawi a. An harsatna te sutkian dan tur fel taka report/recommendation a rang thei ang bera sawrkara thehluh an phut bawk a ni.

Heng an thilphut te hi March 3, 2022 ralhma ngeia tih hlawhtlin sak turin sawrkar chu an ngen a, “Hlawhtlinna kan hmu lo anih chuan hmalak chhunzawm zel dan tur chu ngaihtuah leh a ni ang,” an ti bawk.