Mizoram Rajya Sabh MP in Hmarchhak bial-a Hindi Zirtirtu mamawhna Parliament-ah a sawi

Mizoram Rajya Sabha MP K. Vanlalvena chuan hmarchhak bial-a Hindi zirtirtu mamawhna leh an dinhmun siam that sak a pawimawh thu nimin-a Parliament thutkhawm ah a sawi.

Parliament Budget Session neih mekah nimin khan Mizoram Rajya Sabha MP K. Vanlalvena hian Zero Hour-ah Hindi zirtirtu mamawhna chungchang hi sawiin, Mizoram-ah Hindi zirtirtu High School-ah 384 leh Middle School-ah 724 awmsa te bakah Samagra Shiksha Scheme hnuaiah Hindi zirtirtu 855 lai lak a ni tih a sawi a. Hei hian sawrkar School leh Govt-Aided School te mamawh chu a phuhruk theih rualin hmarchhak bial pum huapin zirna bulthut tak tak, Primary School Level te chu tun thlengin Hindi zirtirtu pek an la ni lo tih a sawi a bawk.

Central sawrkar Samagra Siksha Scheme hnuaia sum hmanna tur thenkhat, Zirtirtute leh Educator te hlawh atana sum sen tur chu kumtin tih tlem tial tial turin ruahman thar siam a ni tih sawiin Rajya Sabha MP chuan, hei hi State sawrkar tan phurrit belh chhahna a nih avangin State tenau zawk, hmarchhak bial State te ang tan chuan he Scheme Component tinah Central sawrkar leh State sawrkar sum intum sem tur chu a pangngai anga 90:10 a la kalpui chhunzawm tura siamthat ni se, a ti a. Chumi rual chuan Samagra Siksha hnuaia Hindi zirtirtu lak te chu state sawrkar hnuaia zirtirtu dangte lak dan nen rualkhai taka kalpui nise, a ti bawk a, hei hi zirna quality tha neih nan thil pawimawh a ni, a ti a. Samagra Sikhsha hnuaia zirtirtuten hlawh tha zawk an neih theih nan sum tam zawk ruahman ni se tiin a sawi bawk a ni.

Mizoram Rajya Sabha MP chuan hmarchhak bial naupangte tan Hindi thiam chu hnam inpumkhatna atana thil pawimawh tak a nih thu pawh sawiin, hmarchhak bial naupangte chu a tlangpuiin Mongolian thlah, nu leh pa te atanga Hindi tawng hmang lo an ni a. State danga Hindi tawng hmang te angin an nu leh pate hnen atangin Hindi zirna tur an nei ve lova. Hmarchhak bial tan Hindi zirtirtu dah chu Army Battalion dah aiin a pawimawh zawk a ni, a ti bawk.

Hei bakah hian School hrang hrangah Hindi zirtirtute chu Muster Roll-a chhawr deuh vek an nih avangin zirtirtu dangte nen an dinhmun a inthlau tih pawh Rajya Sabha MP chuan sawiin, hei hian Hindi ngaih pawimawh lohna a hring thei dawn a ni, a ti a. Hmarchhak bial-a cheng te leh India ram hmun danga chengte inkarah inremna leh inpumkhatna tha zawk a awm theih nan hmarchhak bial-a Hindi zirtirtu mamawhna chu Central sawrkarin ngaih pawimawh a, Hindi zirtirtute dinhmun pawh siam that sak turin a duh thu a sawi bawk a ni.