Hri kai hmuhchhuah tlahniam hret hret zel

Mizoram-ah COVID-19 hri kai hmuhchhuah an la tlahniam zel a, niminpiah khan Sample 5083 enfiah niin heng atang hian hri kai mi 1119 hmuhchhuah an ni a, Sample enfiah atanga chhutin za zela 22.01 te chuan hri an kai a ni.

Niminpiah khan ZMC-a RT-PCR Laboratory-ah Sample 488 enfiah niin heng atang hian hri kai mi 135 hmuh an ni a, Lunglei-a RT-PCR Laboratory-ah Sample 175 enfiah ni bawkin hri kai mi 63 hmuh an ni a, Fluorescent Immunoassay Test hmangin Aizawl District-ah Sample 42 enfiah niin hri kai mi 5 hmuh an ni a, Serchhip District-ah Sample 45 enfiah niin hri kai mi 14 hmuh an ni bawk.

Niminpiah khan District hrang hranga TrueNat Laboratory-ah Sample 154 enfiah niin hri kai mi 40 hmuh an ni bawk a, an zinga 17 te chu Champhai District-a hri kai hmuh te niin Lawngtlai District-ah 14, Serchhip District-ah 6, Siaha District-ah 2 leh Hnahthial District-ah mi pakhat hmuh an ni bawk.

Heng bakah hian Rapid Antigen Test hmangin Mizoram-ah Sample 4179 enfiah niin heng atang hian hri kai mi 862 hmuh an ni bawk a, an zinga 314 te chu Aizawl District-a hri kai hmuhchhuah te niin Serchhip District-ah 109, Lunglei District-ah 100, Khawzawl District-ah 77, Mamit District-ah 60, Champhai District-ah 55, Lawngtlai District-ah 52, Saitual District-ah 46, Siaha District-ah 27 leh Hnahthial District-ah hri kai mi 22 hmuh an ni bawk.

Nimin khan Mizoram-ah hri kai enkawl dam mi 1823 an awm belh leh a, heti hian Mizoram-a hri kai hmuh tawh chu 2,03,325 niin an zinga 1,93,916 te chu enkawl dam ni tawhin hri kai zinga za zela 95.37 te enkawl dam an ni tawh a, hri kai enkawllai 8768 la awmin hri kai te zingah mi 641 an boral tawh bawk a ni.