Scheduled Tribe Certificate lem a nih thu sawi

Tunhnaia Social Media-a Abu Mazumdar Sailo s/o Zoram Chhetri Sailo, Zuangtui, Aizawl-a cheng hnena Scheduled Tribe Certificate pek anga tarlan chu a lem a ni tih Aizawl DC chuan thuchhuah siamin a tarlang.

Hemi chungchanga nimin-a Aizawl DC Dr. Lalhriatzuali Ralte in thuchhuah siama a tarlan danin Deputy Commissioner Office, Aizawl-in Abu Mazumdar Sailo s/o Zoram Chhetri Sailo, Zuangtui, Aizawl-a cheng hnena CSC (Common Service Centre) kaltlanga Scheduled Tribe Certificate a pek (issue) anga lang Social Media-a darh chu Deputy Commissioner Office, Aizawl atanga pek a ni lo tih a tarlang a, a issue tu hming inziak ‘Lalzorama Chhakchhuak, Sub-Deputy Commissioner’ chu DC Office, Aizawl-ah a awm loh thu leh he Certificate (Dt.8.1.2022, Regn No. CCC15030076666) hi a lem a ni tih a tarlang a ni.

Aizawl DC chuan hetiang thil lo thleng hi pawi a th thu leh a ngai thutak hle tih pawh sawiin, “Hemi chungchanga mawhphurtu leh dan bawhchhiatna awmte zawng chhuak tur hian Cyber Crime Police Station, Aizawl-ah FIR thehluh nghal a ni,” a ti a. Hetianga document dik lo leh lem hmanga mipui tihbuaina leh thil diklo hmanga office pawikhawihna hi thleng tawh lo se tiin hetiang thil hmu leh hria chuan DC, Aizawl hnena hriattir zel turin mipuite a ngen bawk.