Serchhip-a Iron Rod zawrh enfiah niin Standard Size leh buk tlinglo te man a ni

Serchhip khawpui chhunga Iron Rod zawrhna dawr-a Iron Rod zawrh te chu nimin khan enfiah niin BIS in a nih tur ang a tih (Standard Size) phaklo te leh a rih zawng-a tlinglo te chu hralhchhuah theihloh tura man a ni.

Tunhnaia Mizoram-a Iron Rod zawrhchhuah ah Bureau of Indian Standards (BIS) in Iron Rod Standard Size tura a ruahman ang phaklo zawrhchhuah a awm nia hriat a nih avanga Serchhip District Bawrhsap hmalaknain Serchhip khawpui chhunga Iron Rod zawrhna dawr hrang hrangte chu Police, Legal Metrology Enforcement Staff, Supply Department leh Consumer Association ten enfiah tura tih a nih angin nimin khan Serchhip khawpui chhunga dawr te enfiah a ni a, he hunah hian Iron Rod zawrhna dawr panga (5) enfiah niin dawr pakhat tihloh chuan Iron Rod zawrhlai hi neiin heng te hi enfiah a ni a, heng dawr hrang hranga Iron Rod zawrhna te hian BIS in Standard Size a sawi chu an phak loh vek avangin The Legal Metrology Act, 2009 Section 30 angin man a ni.

Nimin a heng dawr te enfiahna ah hian Serchhip SDPO Kaste Romalsawma leh Legal Metrology Inspector Johny Zonunmawia bakah Consumer Association hruaitute an tel a, heng dawr hrang hranga Iron Rod zawrh an man te hi hralhchhuah theihloh tura tih niin an man te hi 8mm bundle 35, 10mm bundle 114, 12mm bundle 51 leh 16mm bundle 56 a ni a, Serchhip District Bawrhsap hnenah report thehlut in thutlukna an siam angin hmalak zui tur a ni ang.

Thudawn danin Iron Rod zuartu zinga a tam zawk te chuan an Iron Rod zawrh hi buk lovin a tlawna chhiar (piece) in an hralh a, a rih zawng buk-a zuar pakhat awmin hetianga a tlawn-a chhiara hralh a nih hian a leitute chuan nasa takin sum an seng thlawn thei a ni. Standard Size phaklo Iron Rod hman hian hmasawnna hnathawh hrang hrang ah a nih tur ang ni phak lo thinin, hei hian RCC hmanga hnathawh te a tlo tur angin a tih tlo loh theih bakah chhiatna te pawh a thlen thei a, hei vang hian a nihphung tur ang tiat ngei Iron Rod hman chu a pawimawh thu Legal Metrology Inspector Johny Zonunmawia chuan a sawi a. Tuna Iron Rod a nih tur ang ni phaklo zawrh an man te chu a zuartute thiamloh a ni ngawt lo tih pawh sawiin, State pawnlam atanga rawn thawntu ten Standard Size phaklo an rawn thawn thin vang a ni tih a sawi a. Hetiang hi Aizawl lamah pawh an lo buaipui tawh thu leh Iron Rod engemaw zat chu man a lo nih tawh thu a sawi bawk.