Lenkawl

Chhingchhip Sainik School-a ‘CSD Canteen’ chu nimin khan Home Minister K. Sapdanga’n a hawng.

Serchhip District AIDS Prevention and Control Committee chu nimin khan thukhawmin 'Mobilization for AIDS Suraksha' atana Serchhip District Action Plan siam chungchang sawiho a ni.

Home Minister K. Sapdanga chuan nimin khan Serchhip District Jail tlawhin District Jail thawmthat leh tih changtlunna hna hrang hrang thawh mekte a hmunah a enfiah a. District Jail thuneitute chuan Home Minister hnenah hian an mamawh hrang hrangte an lo thlen nghal bawk a ni.

Serchhip paltlangtu kawngpui Blacktop hna chu nimin khan thawh tan a ni ta.

Serchhip District-a Khumtung khua ah nimin khan African Swine Fever (ASF) vanga Vawk thi paruk chhinchhiah belh leh niin Khumtung khua ah hian kumin ah ASF vanga Vawk thi 20 awm tawhin Vawk 8 suat a ni tawh bawk a. Nimin vek khan Serchhip P&E Veng-ah Vawk thi pahnih a awm leh bawk a ni. Serchhip P&E Veng hi kumin a ASF vanga harsatna tawk nasa ber an ni mek a, chhungkaw 40 ten ASF avang hian harsatna hi tawkin Vawk 113 a thih tawh bakah Vawk 39 suat a ni tawh bawk a ni.

Tun thla ni 11 khian ‘Green Mizoram Day’ chu hman leh a ni dawn a, Serchhip-ah chuan Kikawn leh Keitum inkarah thingtiak phun beihpui thlak leh a ni ang.

Union Minister of State for Information & Broadcasting leh Parliamentary Affairs Dr. L. Murugan chuan zan khat riak turin nimin khan Mizoram a rawn thleng a, nimin vek khan Kolasib District a tlawh nghal bawk.

Sawrkar laipuiin thingtlang mite tana Insak tanpuina a duan, PMAY-G hnuaiah Mizorama Insak tanpuina dawng thei chhungkaw 29,967 zinga chhungkaw 25416-in tanpuina an dawng kim tawh a; PMAY-G 2.0 pawh kalpui thuai tum niin Insak tanpuina dawng tura thlante endik mek an ni a, tun thla ni 10 hmaa endik hna hi zawh tur niin ni 10 hnu lamah chuan sawrkar laipui atangin Insak tanpuina hi dawn theih beisei a ni.

North Eastern Council (NEC) Plenary vawi 73-na chu naktuk, June 4, 2026 hian Shillong (Meghalaya)-ah neih a ni dawn a, hemi atana Mizoram inpuahchahna te chu niminpiah khan Larsap General (Dr) Vijay Kumar Singh hovin Lok Bhavan Conference Room-ah thlirho a ni.

Chief Minister Lalduhoma chuan nimin khan ‘Mizo Ginger USP Mission Project’ te, ‘Price Support Scheme for Arhar Dal, Chhawhchhi leh Nihawi’ te bakah ‘NCEL Ginger Export Awareness Workshop’ te a hawng.