Mizoram Pradesh Congress Committee (MPCC) chuan kumin-a Mizoram budget pharh tak chu mipui pual budget ni lovin Finance Minister Zoramthanga pual budget a ni, an ti.
Inrinni-a Aizawl Press Club a chanchinbumite an kawmna ah MPCC thupuangtu Dr. Lallianchhunga chuan kumin budget ah Chief Minister chanpual ah sum dah hnem bik a ni tih sawiin, “Finance Department-ah hian Major Works-ah ringawt pawh cheng nuai 96249 dah a ni a, CSS (Nuai 35,000) nen phei chuan cheng nuai 131249.99 lai dah a ni a. Hetihlai hian Department engemawzat (Planning, LAD, School Education, H&TE, Agriculture, Horticulture, AH&Vety, RD, Transport, Tourism)-ah te chuan a taka hmasawnna hna thawhna tur Major Works-ah pawisa dahsak an ni lo thung a. Heng department changtu Minister-te hian hmasawnna hna thawh an duh a nih chuan Chief Minister leh Finance Minister ni kawp Zoramthanga hi nasa taka an tlawn a ngai leh dawn tihna a ni,” a ti.
MPCC thupuangtu chuan tun tum budget-ah budget siamrem ngai, Supplementary demand cheng vbc. 6025.44 zet a awm nia sawiin, hei hi kum 2021-2022 Budget atanga chhutin 54.04% a nih thu leh Budget chanve aia tam siamrem ngaia a awm hian Budget pawn lama sum hman a tam zia a lantir niin a sawi a. “Hei hian sum leh pai enkawlna kawnga MNF sawrkarin kalphung mumal an neih loh zia leh an hlawhchham zia a tarlang chiang hle a ni,” a ti a. Congress sawrkar khan sum dinhmun a siamtha tih sawiin, MNF sawrkar a lo pian hnuah hian Mizoram sawrkar leiba nasa takin a pung niin a sawi bawk.
Comments
Post a Comment