Serchhip damdawi In kawt-a Sample lakna leh Rapid Antigen Test hmanga Sample enfiahna chu sawn a ni dawn a, COVID-19 hri kai hmuhchhuah te phurhna turin Motor pakhat ruahman niin bialtu MLA, Lalduhoma chuan hemi atana senso hi a tum dawn a ni.
Niminpiah khan Serchhip District-ah CO-VID-19 hri kai mi 20 hmuhchhuah an ni a, nimin khan hri kai mi pathum hmuh leh an ni bawk.
Niminpiah-a Mizoram-a Sample enfiah 3871 atangin COVID-19 hri kai 240 zet hmuhchhuah leh niin darkar 24 chhunga Mizoram-a hri kai hmuhchhuah tam ber ni a ni leh a, Mizoram-a hri kai hmuhchhuah pawh mi sang riat aiin an tam ta a ni.
Serlui bialtu MLA, Lalrinsanga Ralte chuan nimin khan a bial chhunga COVID-19 hri kai, Covid Care Centre a awm mek te thlamuanin an mamawh hrang hrangte chu CCC enkawltute kaltlangin a hlan.
Central YMA chuan COVID-19 hri vanga thi te sawngbawl dan tura duan chu a theih chin chinah zawm turin an hnuaia YMA Sub-Hqrs., Group leh Branch te chu an ngen.
March 13, 2021-a Maubawk-a kangmei tuarte tana In an sak, Assam Type In pali (4) chu nimin zing khan Maubawk Joint Committee chuan In neitute hnenah an hlan.
Mizoram State Health Care Scheme (MSHCS) hnuaiah COVID-19 hri kai ten an inenkawlna senso bill theiin mi 78-in an bill tawh a, Health Care Scheme-a inziaklutte hian damloh vanga an inenkawlna senso cheng nuai 2 thlengin an bill thei a ni.
Mizoram sawrkar-a School Education Department chuan kum 2021-2022 Academic Session atan Class zawng zawng (Pre-Primary atanga pawl XII) te chu hriattirna dang awm hma chu Class kalloh chhunzawm tur a nih thu sawiin, a theih chin chinah Online Class neih phal a ni thung.