Sawrkar kumthar-ah SEDP in chhungkaw 60,000 tuam tum niin cheng vbc. 300 vel ruahman a ni dawn

SEDP Executive Board Chairman leh Deputy Chief Minister Tawnluia chuan sawrkar kum thar lo awm turah SEDP hmangin chhungkaw 60,000 vel tuam tum anih thu sawiin, hemi atan hian cheng vbc. 300 bawr vel ruahman a ni dawn tih a sawi a, “Sum kan neih dan zirin kan kal zel dawn a ni,” a ti.

SEDP Executive Board thutkhawm vawi 1-na nimin a Assembly Conference Hall, Assembly Annex Building-a neih ah he thu hi sawiin SEDP Executive Board Chairman Tawnluia chuan Sawrkar Flagship Programme SEDP bul tan chhoh tawh chu chhunzawm zelin mimal leh chhungkua te thleng tur Scheme leh Programme sawiho nana Board Meeting a vawikhatna atana neih chu lawmawm a tih thu a sawi a, SEDP chu mipui te dawmkanna tur bakah ram hmasawnna tur atana duan a nih angin zau takin an ngaihdan leh tul leh pawimawh nia an hriat leh ngaih te chu sawichhuak turin he huna tel MLA te chu a sawm a. Covid hripuiin kum 2 zet min tuam avangin duh anga chakin hma a lak theih loh chu pawi a tih thu sawiin, “Sawrkar in sum a neih dan ang zel in SEDP hi theihtawp chhuahin mipui leh ram hmasawnna leh changkanna atan kan kalpui dawn,” a ti a. Sawrkar kum thar lo awm turah SEDP hmangin chhungkaw 60,000 vel tuam tum anih thu sawiin, hemi atan hian cheng vbc. 300 bawr vel ruahman a ni dawn tih a sawi a, hei hi a thawhkhatna tur a nih thu pawh sawiin, “Sum kan neih dan zirin kan kal zel dawn a ni,” a ti.

He thutkhawm ah hian State Planning Board Vice Chairman H. Rammawi pawhin kum 2019 atangin SEDP kenkawh leh kalpui dan chungchanga State Planning Board in hma an lak dante sawiin, kum thum chhungin hmalakna hrang hrang te awm tawhin Agriculture, AH & Vety leh Commerce & Industries, Horticulture leh Fisheries Department-te hnuaia Beneficiary Oriented Scheme te chu lo kalpui tawh a ni tih a sawi a. Mahse hripuiin min nuai avangin Sawrkar chu a tum angin kan kal thei lova, Beneficiary Oriented Scheme chungchangah pawh duh angin ke an pen chak thei lo tih sawiin, SEDP sum beneficiary te dawn tur chu an Account-a Direct Transfer angin thun a nih tur thu a sawi bawk.

He thutkhawm ah hian District Level leh Village Level-a SEDP kalpui nana Board/Committee tur ruangam chungchangte, beneficiary thlan chungchangte, thlai leh trade hrang hrang thlan chungchangte, thlai/thei loneitute an chin mek, engemaw chen an hlawhtlinpui tawh, hlawhltling zawka SEDP hnuaia chhunzawm dan chungchang te, thingtlang leh khawpui a SEDP kalpui dan tur chungchangte, beneficiary te tuina leh an hlawhtlinpui ngei theih thil ngaihpawimawh chungchangte chu zau takin sawiho a ni a. MLA hrang hrang ten an biala SEDP hmalakna atana pawimawh leh ttul nia an hriatte pawh sawiin, rawtna hrang hrang an siam tel bawk a ni.

Sawrkar chuan January ni 31, 2022 khan SEDP Executive Board ruatna leh an mawhphurhna tur chungchanga hriattirna a chhuah a, Deputy Chief Minister Tawnluia chu he Board-ah hian Chairman niin State Planning Board Vice Chairman H. Rammawi chu Vice Chairman-ah ruat a ni a. Board Member atan MLA mi 14-Lalrin-tluanga Sailo, Er. H. Lalzirliana, Lalrinsanga, C. Lalmuanpuia, Prof. F. Lalnunmawia, L. Thang-mawia, Dr. ZR. Thiamsanga, Zothantluanga, Ramthanmawia, Dr. Vanlaltanpuia; Lawm-awma Tochhawng, Prof. K. Pachhunga, H. Biakzauva leh K. Laldawngliana te an ni.

Anni bakah hian Department 10- Agriculture, Horticulture, AH&Vety, Commerce & Industries, UD&PA, RD, Land Resources & Water Conservation, Sericulture, Land Revenue & Settlement leh Fisheries Department-a Director bakah Secretary, Planning & Programme Implementation Department chu Member Secretary atana ruat a ni bawk.