Serchhip Bukpui-a 132kV Sub-Station atanga Serchhip khawpui chawmna tih changtlunna tura 12MVA Transformer rawn phurh thlen chu nimin khan a dahna tura dahfel niin he khawl hi hman a nih hunah chuan Transformer chhe palh a awm changa khawpui chhung Power Supply inpekchhawk ngai thin chu sutkian theih beisei a ni.
Darkar 24 kalta chhung khan Mizoram-ah COVID-19 hri kai hmuhchhuah thar mi 40 zet an awm leh a, hri kai zingah hian Mizoram sawrkar-a Health Secretary, H. Lalengmawia pawh a tel a ni.
Mizoram Pradesh Youth Congress Committee (MPYCC) chuan Mizoram sawrkar chu RT-PCR Test man tihniam tura an phut thu sawiin, Mizoram-a Private damdawi In ah te RAT Test phalsak vat an duh thu an sawi.
Disaster Management & Rehabilitation Department chuan COVID-19 laka mipuite inveng chunga nunphung khaihlak lutuk lova kan kal zel dan tur ruahmanna Sawrkar in a siamte chu tha taka zawm turin mipuite an chah.
Outlook chanchinbu in kumtin-a an tih thin anga kumina zirna In tha a thlannaah Mizoram University chu India rampuma University tha 58-na a ni a, Central University bikah chuan 11-na a ni.
Mamit District Hospital-a TrueNat Laboratory chu hman theiha peihfel niin nimin khan hman tan a ni.
COVID-19 hri kai te enkawl dan chungchang ngaihtuahin nimin khan Health Minister, Dr. R. Lalthangliana hovin thutkhawm hmanhmawh neih a ni a, COVID-19 hri kai, an taksa a natna langchhuaklo te In lama inenkawl dan tur ruahmanna duan chu thlirhovin Chief Minister hnenah he ruahmanna thar hi thlen nghal nise an ti.
Serchhip District chhunga Iron Rod zawrhna dawr hrang hrangte chuan Electronic Weighing Machine an hmang vek tawh.
Serchhip-a Traffic Police te chuan nimin khan khawl thar hmangin lirthei Insurance enfiah hna an thawk a, Insurance thi tawh leh Agent lem atanga Insurance ti dapchhuah hna hi ngawrh zawka kalpui tur a ni ang.