Nikum-ah Serchhip-ah ruahtui 957.2 mm tla in khaw lum ni berah 35°C a tling phak

Nikum (2021) chhung khan Serchhip-ah ruahtui millimetre (mm) 957.2 a tla anga chhinchhiah a ni a, ni khat-a ruahtui tla tam ber ni October 21, 2021-ah ruahtui millimetre 42.9 tla anga chhinchhiah a ni a. Khaw lum ni bera chhinchhiah ah khawlum lam chu 35°C a ni bawk.

Economic & Statistic Department hnuaia District Research Officer (DRO) Office Serchhip chuan Serchhip-ah ruahtui tlak dan leh khaw lum lam bakah thli nat zawng tehna an neih thu sawiin, hemi hmang hian nitin Serchhip dinhmun hi an enfiah reng thu an sawi a. Heta an hmuh danin nikum chhung khan Serchhip-ah ruahtui mm 957.2 tla anga chhinchhiah a ni tih an sawi. Chhinchhiahna atanga a lan danin nikum (2021) ah khan January leh February thla ah ruahtui tla chhinchhiah a awm lova, ruahtui tla chhinchhiah hmasak ber chu March 30-ah niin hemi ni hian 1.2mm a tla a, a tuk-ah 04. mm tla lehin March thla ah hian 1.6 mm a tla a, April thla ah ruahtui tlak ni khat chhinchhiah awmin 0.3mm a tla a, May thla ah ni 3 ruahtui tla chhinchhiah niin 4.6mm a tla a, June thla ah erawh ruahtui tla chhinchhiah loh ni 5 chiah awmin June thla chhung hian ruahtui 251.5 mm zet a tla a, nikum chhunga thla khat-a ruahtui tla a tam ber thla a ni.

Chhinchhiahna atanga a lan danin nikum-a ruahtui tlak tam ber ni chu October 21 kha niin hemi ni hian ruahtui 42.9 mm zet a tla nia chhinchhiah a ni a, ni khat-ah ruahtui 30 mm aia tam a tlak ni 3 awm a, thla khat chhunga ruah sur loh ni tlemna ber July thla ah ni 2 chiah ruahtui tlak loh a awm a ni.

Ni tin-a boruak lum leh vawt lam tehna ah nikum chhunga khaw vawh ber ni chu February ni 1 niin hemi ni hian 1°C a ni a, 5°C aia khaw vawh ni hi January thla ah ni thum awmin February thla ah ni li a awm bawk a, khaw lum ber ni chu April 28 niin 35°C a tling a, April 26-ah 34°C niin April 15 leh 23-ah 33°C a tling bawk a ni.