Basketball Federation of India (BFI) buat-saih 71st Senior National Basketball Championships Men & Women chu naktuk, April 3, 2022 hian Nehru Stadium, Chennai, Tamil Nadu-ah khelh a ni dawn a, Mizoram Team a tel turte zingah hian Serchhip tlangval Michael Liansanga, Chanmari Veng chu a tel a ni.
MFA Cup khelh mekah Serchhip District aiawh kal FC Serchhip Kawnpui chuan Semi Final an lut ta a, Vawiin hian Semi Final hi khelh nghal tur a ni ang.
Mizoram Chief Secretary Dr. Renu Sharma IAS chuan zankhat riakin Serchhip a rawn tlawh mek a. Nimin khan Thenzawl-a AH&Vety Department hmalakna te tlawhin Vawiin hian Serchhip-a sawrkar Department hotute kawmin sawrkar hmalakna thenkhat a hmunah a tlawh bawk ang.
Tun sawrkar kumthar atanga Central sawrkar Scheme thar Pradhan Mantri Adi Aadarsh Gram Yojana (PMAAGY) kalpuina tur atana thlan Hualtu khua chu nimin khan bialtu MLA leh Assembly Deputy Speaker Er. Lalrinawma chuan a tlawh.
Serchhip Sub-Hqrs. YMA huamchhunga Group YMA pakhat, Tuichangral South Group YMA chuan YMA leh Mizoram PWD in Memorandum of Understanding (MoU) an ziah chu tih tawp an duh tih an sawi.
Nimin khan Serchhip District-ah COVID-19 hri kai mi 27 hmuh belh leh niin hri kai enkawl dam mi 28 an awm thung.
Mizoram leh Assam ramri buai chungchang ah State pahnih aiawhte chu nimin khan internet kaltlanga inbiai in ramri-a chetna thleng lo tura boruak vawnhim zel an duh thu an tarlang.
Niminpiah khan Mizoram-ah Sample 847 enfiah niin COVID-19 hri kai mi 162 hmuhchhuah an ni a, Sample enfiah atanga za zela 19.13 zetin hri an kai a ni.
Rural Development Minister Lalruatkima chuan Tuirial-a Limbu Tui sawngbawlna hmun, Tuirial Lemon Processing Unit chu nimin khan a hawng.
Civil Aviation Wing-a Principal Consultant Wg.Cdr. J. Lalhming-liana chuan Lengpui Airport cheithat hna thawh mek tunhnaia chim ah Mizoram sawrkar hian chengkhat pawh a sen belh dawn lo tih a sawi.
Indian Oil Corporation (IOC) in khawnvartui (K. Oil) man a tihpun zel vangin khawnvartui semtu Retailer engngemaw zatte chuan mipuite hnen a hralh/khultir tam theih an inring lo a, hemi vang hian March, 2022 a sem tur khul ngam lo an awm nual nia thudawn a ni.
Mumbai-a zin Sports Minister Robert Romawia Royte chuan TATA Trusts hotute kawmin Mizoram-a infiamna hmasawnna tura TATA Trust te nena thawhhona leh hmalakna chungchang a sawipui.
Mizoram-a COVID-19 hri leng mek dinhmun chu State Disaster Management Authority chuan thlirin ziaawm lam a pan hret hret nia hriain inkaihhruaina pawh thlahdul hret a ni.